<p style="text-align: justify;">جلالاباد (پژواک، ۴ تله ۱۴۰۲): د ننګرهار د ټولګټو چارو رياست وايي چې د ۲۱ میلیون افغانیو په لګښت د جلالاباد – تورخم لویې لارې بیارغونې چارې پيل شوې.</p>
<p style="text-align: justify;">یاد ریاست زیاتوي چې د دغه سړک ډېرې برخې د موټرو ډېرې ګڼېګوڼې او نورو لاملونو له امله تخريب شوې او بيارغونې ته اړتيا لري.</p>
<p style="text-align: justify;">د سړک رغولو چارې نن د ننګرهار د مومندرې ولسوالۍ اړوند له لنډي خيبر سيمې پيل شوې.</p>
<p style="text-align: justify;">د ننګرهار د ټولګټو چارو رييس مولوي يارمحمد محمدي وويل، د جلالاباد – تورخم ۷۵ کيلومتره سړک چې نږدې دوه لسيزې مخکې جوړ شوی، بيارغولو ته اړتيا درلوده.</p>
<p style="text-align: justify;">هغه وايي، د ټولګټو وزارت د ۲۱ ميليون افغانيو په لګښت د دغه سړک د داغنيونې او ترميم چارې رسماً پيل کړې چې د شپږو مياشتو په موده کې بشپړې شي.</p>
<p style="text-align: justify;">د ننګرهار مرستيال والي سعيداحمد بنوري چې د دغو چارو پرانيستي مراسمو کې يې برخه اخيستې وه، دغه کار يې نه يوازې د تورخم له لارې پاکستان ته د تلونکو مسافرو او ترانسپورټ لپاره ګټور ياد کړ، بلکې پر دې لارې د پرتو ولسواليو د خلکو يوه اړتيا يې هم وبلله.</p>
<p style="text-align: justify;">نوموړي د دغه سړک ترميموونکي شرکت له مسوولينو وغوښتل چې د کار کيفيت ته ډېره پاملرنه وکړي.</p>
<p style="text-align: justify;">بلخوا د دې لارې مسافر د سړک رغولو ته خوښ دي.</p>
<p style="text-align: justify;">د جلالاباد – تورخم لین یوه موټرچلوونکي منصور وویل، د دغه سړک خرابوالي له امله هره اونۍ موټر د جوړېدو په موخه مستري ته دروي او د ګټې پر ځای يې تاوان ډېر دی.</p>
<p style="text-align: justify;">هغه د یاد سړک رغونې پر چارو خوښي وښوده، ویې ویل چې د سړک رغولو چارې باید په ښه کیفیت ترسره شي.</p>
<p style="text-align: justify;">دغه راز اکبر چې د مومندرې ولسوالۍ د ګرديغوث اوسېدونکی دی، د دغه سړک رغونې چارو پر پيل خوښ دی خو غوښتنه کوي چې د جلالاباد – تورخم دويم لين سړک پاتې کارونه دې هم پيل شي.</p>
<p style="text-align: justify;">د جلالاباد – تورخم دويم لين سړک جوړولو چارې شاوخوا ۱۳ کاله مخکې د پاکستان له خوا پيل شوې وې خو تر اوسه نیمګړې پاتې دي.</p>
