<p style="text-align: justify;">[restrict paid="true"]</p>
<p style="text-align: justify;">کندهار (پژواک، ۱۲ تله ۱۴۰۲): کندهار ولایت کې ځایي چارواکي وایي چې پاکستانیو ځواکونو د وېش په دروازه کې پر عامو افغانانو ډزې کړې چې له امله یې درې کسان ټپیان شوي دي.</p>
<p style="text-align: justify;">د کندهار د سپینبولدک ولسوالۍ امنیه قوماندانۍ له خوا د تلې په ۱۲مه، ناوخته په یوه خپره شوې خبرپاڼه کې راغلي چې دغه پېښه نن له غرمې وروسته شاوخوا درې بجې شوې ده.</p>
<p style="text-align: justify;">په خبرپاڼه کې راغلي چې په ټپیانو کې دوه ماشومان او یو سپین ږیری شامل دي.</p>
<p style="text-align: justify;">د کندهار امنیې قوماندانۍ هم د یوې خبرپاڼې په خپرولو سره ویلي، د کندهار سپینبولدک اړوند وېش پر فرضي کرښه له پاکستاني ځواکونو سره هغه مهال نښته شوې چې هغوی پر ملکي خلکو او لارویانو ډزې وکړې.</p>
<p style="text-align: justify;">سرچینې لیکلي، په پېښه کې د دواړو غاړو ملکي خلکو ته مرګژوبله اوښتې ده.</p>
<p style="text-align: justify;">په خبرپاڼه کې زیاته شوې وروسته بېرته حالات عادي شوی او د پیښې د اصلي لامل په اړه پلټنې پیل شوې دي او مسوولین هڅه کوي چي د داسو پېښو د تکرار مخنیوی وکړي.</p>
<p style="text-align: justify;">بلخوا د پاکستان پوځ په یوه اعلامیه کې ادعا کړې چې لومړۍ ډزې افغان لوري کړې وې چې له امله یې دوه پاکستانیان وژل شوي او یو تن ټپي دی.</p>
<p style="text-align: justify;">له دې مخکې پاکستانیو ځواکونو په تورخم دروازه کې هم پر افغان لوري ډزې کړې وې او یو شمېر کسانو ته یې مرګژوبله اړولې وه.</p>
<p style="text-align: justify;">د یادونې ده، څو میاشتې مخکې هم په دغه سیمه کې د دواړو هېوادونو د ځواکونو ترمنځ نښته شوې چې له امله یې یو شمېر کسانو ته مرګژوبله اوښتې او لاره د څو ورځو لپاره بنده شوې وه.</p>
<p style="text-align: justify;">[/restrict]</p>
