<p style="text-align: justify;">کابل (پژواک، ۸ لړم ۱۴۰۲): سیمهییز مسوولین وايي چې په دایکنډي، فراه او نیمروز کې له څه باندې ۶۵۰۰ کورنیو سره د خوراکي او غیرخوراکي توکو، په لوګر او جوزجان کې له څه باندې شپږ زره کورنیو سره نغدي او په پنجشېر کې له پنځه زره بزګرانو سره د غنمو اصلاح شوي تخم او سرې مرستې وشوې.</p>
<p style="text-align: justify;">د دایکنډي ولایت د کلیو پراختیا او بیارغونې ریاست په خبرپاڼه کې راغلي چې دغه ولایت په مرکز نیلي، کجران او پاتو ولسوالیو کې د ملګرو ملتونو د خوړو نړۍوال سازمان له لوري له ۴۷۶۳ اړمنو کورنیو سره د خوراکي توکو مرسته وشوه.</p>
<p style="text-align: justify;">د سرچينې د معلوماتو له مخې، په دغو مرستو کې هرې کورنۍ ته ۵۰ کیلوګرامه اوړه، پنځه لېتره غوړي، ۶.۲۵ کیلوګرامه دال، نیمه کیلو مالګه او درې کیلوګرامه د ماشومانو تقویتي خواړه ورکړل شول.</p>
<p style="text-align: justify;">د فراه ولایت د کلیو بیارغونې او پراختیا ریاست په خبرپاڼه کې راغلي چې د دغه ولایت په ګلستان ولسوالۍ کې هم د خوړولو نړیوال سازمان له لورې له ۱۳۹۹ اړمنو کورنیو سره د خوراکي توکیو مرسته شوې ده.</p>
<p style="text-align: justify;">د لوګر د کلیو پراختیا او بیارغونې ریاست مطبوعاتي مسوول صبغت الله نایبخېل هم وایي چې د دغه ولایت په خوښۍ ولسوالۍ کې د ملګرو ملتونو د پروژوي خدمتونو (UNOPS) دفتر په مالي ملاتړ له لورې پر شاوخوا درې زره اړمنو کورنیو ۱۷.۷ میلیونه افغانۍ ووېشل شوې.</p>
<p style="text-align: justify;">د سرچينې د معلوماتو له مخې چې په دغو مرستو کې هرې کورنۍ ته ۶۵۰۰ افغانۍ ورکړل شوې.</p>
<p style="text-align: justify;">د یو بل خبر له مخې، د پنجشېر د کرنې او مالدارۍ رییس فضلالله دیوبندي وایي، په تېرو اوو ورځو کې د دغه ولایت د بېلابېلو سیمو له پنځه زره بزګرانو سره د ملګرو ملتونو د خوړو او کرنې ادارې په مالي مرسته او د ناروې کمېټې په همکارۍ، د غنمو د اصلاح شوي تخم او تورې کیمیاوي سرې مرسته وشوه.</p>
<p style="text-align: justify;">د هغه د معلوماتو له مخې، له هر بزګر سره پنځوس کیلوګرامه د غنمو اصلاح شوی تخم او پنځه کیلوګرامه توره سره مرسته شوي دي.</p>
<p style="text-align: justify;">دیوبندي وایي، دغه مرسته د ترسره شوې سروې له مخې له هغو بزګرانو سره شوې چې تر دوه جریب ډېره ځمکه یې کرلې ده.</p>
<p style="text-align: justify;">د جوزجان ولایت د کډوالو او بېرته راستنېدونکو چارو رئیس ملا طلحه وایي چې د دغه ولایت په مرکز شبرغان، فیضاباد او آقچه ولسوالیو کې له ۳۲۰۸ کورنیو سره د سرپناه جوړولو په موخه په درېو مرحلو کې نقدي مرسته کیږي.</p>
<p style="text-align: justify;">هغه وویل چې د یادو مرستو په لومړۍ مرحله کې نن له یادو ۳۲۰۸ کورنیو څخه هرې کورنۍ سره ۲۴۶۰۰ افغانۍ مرسته وشوه.</p>
<p style="text-align: justify;">د هغه په خبره چې د یادو کسانو کورونو د تېرو جګړو پر مهال ویجاړ او یا هم زیانمن شوي وو او اوس ورسره د بیارغولو په موخه دغه مرسته کیږي.</p>
<p style="text-align: justify;">هغه وویل چې د دغو مرستو په دوېمه مرحل کې به له یادو هرې کورنۍ سره ۴۳۹۰۰ او په درېمه مرحله کې به ۴۱۰۰۰ افغانۍ مرسته وشي.</p>
<p style="text-align: justify;">د نیمروز ولایت د کډوالو او بېرته راستنېدونکو چارو رئیس مولوي عبدالله ریاض وایي چې د دغه ولایت په دلارم ولسوالۍ کې له ۵۰۰ وچکالۍ ځپلو کورنیو سره د خوراکي او غیرخوراکي توکیو مرستې وشوې.</p>
<p style="text-align: justify;">د یو بل خبر له مخې، د شهیدانو او معلولینو چارو وزارت وایي، په لغمان، کونړ او نورستان ولایتونو کې ۱۵۰۰ یتیمانو، کونډو او معلولینو د اتو میلیون او ۲۵۰ زرو افغانیو په ارزښت اوړه، غوړي، وریجې، سوجي اوړه، مکروني، بوره، چای، لوبیا او دال وېشل کېږي.</p>
<p style="text-align: justify;">سرچینه زیاتوي چې په دې اړه نن دغه وزارت له یوه خیریه بنسټ سره هوکړه لاسلیک کړه.</p>
<p style="text-align: justify;"></p>
