<p style="text-align: justify;">پلعلم (پژواک، ۲۱ لړم ۱۴۰۲): د لوګر د پوهنې ریاست وایي، یوه کس په خپل شخصي لګښت یو مرکز پرانیستی چې ۸۰۰ یتیم او بېوزله ماشومان په کې په وړیا توګه زدهکړې کوي.</p>
<p style="text-align: justify;">د لوګر د پوهنې ریاست ویاند شاهپور عرب پژواک خبري اژانس ته وویل چې د محمداکبر په نوم د پوهنې یوه مینهوال له لوري د مرکز پلعلم په غیرتاباد سیمه کې پر دوهنیم جریبه ځمکه یو ښوونیز مرکز جوړ شوی دی.</p>
<p style="text-align: justify;">عرب زیاته کړه، د دغه مرکز په جوړولو دوهنیم میلیونه افغانۍ لګول شوې چې پر دفتري وسایلو سربېره اداره، مجهز کمپیوټرلب، شپږ درسي ټولګي او نور د اړتیا وړ ملحقات لري.</p>
<p style="text-align: justify;">د هغه په وینا، محمداکبر اتل له تېرو څو کلونو راهیسې د لوګر په مرکز پلعلم او یو شمېر ولسوالیو کې د نجونو او هلکانو د لیک لوست په موخه له پوهنې ریاست سره په همغږۍ فعالیت کوي او موخه یې له لیک لوسته محرومو ماشومانو ته د زدهکړو زمینې برابرول دي.</p>
<p style="text-align: justify;">د لوګر د پوهنې ریاست ویاند زیاتوي، په دغه ښوونیز مرکز کې د کال دوولس میاشتې شاوخوا ۸۰۰ بېوزلو او یتیمو ماشومانو ته په وړیا ډول د دیني او عصري زدهکړو زمینه برابره شوې ده.</p>
<p style="text-align: justify;">هغه وايي چې زدهکوونکو ته کتابونه، درسي توکي او د ژمي جامې هم د همدغه ښوونیز مرکز له خوا ورکول کېږي.</p>
<p style="text-align: justify;">دغه راز محمداکبر اتل پژواک ته وویل چې له خپلو څو همفکره ملګرو سره یوځای یې هڅې پیل کړې څو د دغه ولایت په لرو او وروستهپاتې سیمو کې ماشومانو ته د زدهکړو زمینه برابره کړي.</p>
<p style="text-align: justify;">هغه زیاتوي، دغه کار یې د یوه احساس له مخې پیل کړی او فکر کوي چې یوازې د پوهې له لارې خلک او هېواد له بدمرغیو ژغورل کېدای شي.</p>
<p style="text-align: justify;">هغه وویل: «تازه مې په غیرتاباد سیمه کې د حاجي منګل احمدزي په نوم یو ښوونیز مرکز جوړ کړی چې ۸۰۰ بېوزله او یتیم هلکان او نجونې په کې زدهکړې کوي.»</p>
<p style="text-align: justify;">د نوموړي په خبره، دغو ماشومانو ته په وړیا توګه د عصري زدهکړو ترڅنګ دیني زدهکړې هم ورکول کېږي.</p>
<p style="text-align: justify;">اتل وویل چې د دغه مرکز لګښت د خپلې سوداګرۍ له ګټې ورکوي.</p>
<p style="text-align: justify;">هغه دغه راز زیاتوي، دوی پلان لري چې دغه ډول ښوونیز مرکزونه نورو سیمو کې هم جوړ کړي.</p>
<p style="text-align: justify;">د یاد ښوونیز مرکز یوه ۱۲ کلن زدهکوونکي عبدالله پژواک ته وویل، خوښ دی چې په کلي کې یې د بېوزله زدهکوونکو لپاره ښوونیز مرکز پرانیستل شوی دی.</p>
<p style="text-align: justify;">هغه زیاته کړه، په دغه مرکز کې سلګونه بېوزله او له زدهکړو محروم زدهکوونکي په بېلابېلو ټولګیو کې په لیک لوست بوخت دي.</p>
<p style="text-align: justify;">لوګر پلازمېنې کابل ته څېرمه ولایت دی؛ په مرکز پلعلم او ولسوالیو کې یې ۲۷۵ ښوونځي پرانیستي دي چې د ۵۲۰ ښځینهوو په ګډون د ۴۳۹۰ ښوونکو له خوا ۱۰۰ زره هلکانو او ۵۰ زره نجونو ته زدهکړې ورکول کېږي.</p>
