لغمان کې له څه باندې زرو کورنیو سره د خوراکي توکو مرسته وشوه

کابل (پژواک، ۲۳ لړم ۱۴۰۲): سیمه‌ییز مسوولین وایي، په لغمان ولایت کې د ملګرو ملتونو د خوړلو نړۍوال پروګرام له لوري له څه باندې زرو اړمنو کورنیو سره د خوارکي توکو مرسته وشوه.

د لغمان ولایت د کلیو پراختیا او بیارغونې رییس مولوي محمدظاهر زرکمر پژواک خبري اژانس ته وویل چې دغه مرسته یې نن په دولت‌شاه ولسوالۍ کې په ۱۰۳۴ کورنیو وېشلې ده.

د هغه د معلوماتو له مخې، په دغو مرستو کې هرې کورنۍ ته ۵۰ کیلوګرامه اوړه، شپږ کیلوګرامه دال، ۴.۵ لېتره غوړي، یونیم کیلو مغزي حلوا او نیمه کیلو مالګه ورکړل شوي دي.