خوست کې «د ټولنې پر بنسټ د تغذیې پروګرام» د خوارځواکۍ په اړه د عامه پوهاوي کمپاین پیلوي

کابل (پژواک، ۲۴ لړم ۱۴۰۲): سیمه‌ییز مسوولین وایي، په خوست ولایت کې د «د ټولنې پر بنسټ د تغذیې پروګرام» ۶۵۴ کارکوونکو ته اړوند روغتیایي وسایل ورکړل شوي څو خلکو ته د خوارځواکۍ په اړه عامه پوهاوی ورکړي.

د دغه پروګرام مسوول ډاکټر سیدانور پژواک خبري اژانس ته وویل چې یاد پروګرام مالي ملاتړ د ملګرو ملتونو د ماشومانو د ملاتړ صندوق (یونیسف) له لوري کېږي.

هغه وایي چې د یاد پروګرام په ۶۵۴ کارکوونکو کې نیمایي یې ښځې دي چې خلکو ته به د خوارځواکۍ په اړه معلومات ورکوي او له دغه کار څخه یې موخه په ټولنه کې د خوارځواکۍ له امله د ماشومانو د مړینې کچې ټېټېدل دي.

د هغه په خبره، نن یادو کارکوونکو ته د خوارځواکۍ عامه پوهاوي په اړه اړوند روغتیایي وسایل او توکي ورکړل شول.

هغه وویل: «دغو روغتيايي کارکوونکو ته دوه دوه ورځې ټرينېنګ ورکوو چې د خلکو اړېکې کلينيک سره پيدا کړو، ځکه که د خوارځواکي ناروغ دوه کلونو پورې تداوي نه شي، بيا تداوي نه لري.»

د یاد پروګرام یوه روغتيايي کارکوونکې نصيبه وايي چې د دغه ولایت په لرې پرتو سیمو کې د خوارځواکۍ کچه ډېره لوړه ده او د دوی هڅه به دا وي چې په دې برخه کې له خلکو سره همکاري وکړي.

د یوه بل خبر له مخې، د میدان‌وردګو ولایت د طبیعي پېښو پر وړاندې د چمتوالي رییس مولوي فیض‌الله جلالي پژواک خبري اژانس ته وویل چې د دغه ولایت په چک ولسوالۍ کې یې له ۳۵۰ سېلاب‌ځپلو کورنیو سره د خوراکي توکو مرسته کړې ده.

هغه وویل چې دغه مرسته یې د مسلم هنډز موسسې په مالي ملاتړ وېشلې ده.

د هغه د معلوماتو له مخې، په دغو مرستو کې هرې کورنۍ ته ۵۰ کیلوګرامه اوړه، لس کیلوګرامه وریجې، پنځه لېتره غوړي، درې‌نیم کیلوګرامه نخود، دوه کیلوګرامه بوره، یو کیلوګرامه مۍ، دوه کیلوګرامه دال او یو من لوبیا ورکړل شوي دي.