<p style="text-align: justify;">کابل (پژواک، ۲۵ لړم ۱۴۰۲): د ملګرو ملتونو د خوړو نړۍوال پرواګرام وایي، تر اوسه یې له پاکستانه را ایستل شوو ۱۱۲ زره افغان کډوالو سره مرسته کړې او د یو میلیون نورو کډوالو لپاره ۱۶ میلیون ډالرو ته اړتیا لري.</p>
<p style="text-align: justify;">دا په داسې حال کې ده چې پاکستان د روان کال د نومبر میاشتې له لومړۍ د افغان کډوالو ایستل پیل کړي او تر اوسه یې زرګونه کورنۍ وتلو ته مجبورې کړې او دا لړۍ لا هم روانه ده.</p>
<p style="text-align: justify;">دغه بنسټ پر خپله ایکسپاڼه لیکلي، په پاکستان کې ۳ اعشاریه ۷ میلیونه افغان کډوال اوسېږي، ډېری دوی اړ کړای شوي چې خپل هېواد ته ستانه شي.</p>
<p style="text-align: justify;">د سرچینې په خبره، تر اوسه دغه بنسټ له ۱۱۲ زره هغو کډوالو سره چې په زور را ایستل شوي، د نغدو پیسو او خوراکي توکو مرستې کړې او له دغو کډوالو سره د مرستو د دوام په موخه فوري بودجې ته اړتیا لري.</p>
<p style="text-align: justify;">سرچینې ویلي، د یو میلیون نورو کډوالو مرستو ته چې په اجباري ډول را ایستل کېږي، ۱۶ میلیون ډالرو ته اړتیا لري.</p>
<p style="text-align: justify;">دغه راز دغه بنسټ پر خپله ایکسپاڼه یوه ویډیو کلېپ کې ویلي: «لسګونه زره افغانې کورنۍ مجبورې دي چې په پاکستان کې خپل هر څه پرېږدي او په ډېر بد وضعیت کې افغانستان ته ستنې شوې، د ژمي په رارسېدو سره دوی د خوړو لپاره څه نه لري او د تلو لپاره ځای نه لري، دا په نړۍ کې تر ټولو لوی بشري ناورین دی.»</p>
<p style="text-align: justify;">په دغه ویډیو کلېپ کې راغلي چې ډېرې دغه کورنۍ په داسې حال کې خپل هېواد ته راستانه شوي چې خپل ډېر عمر یې په پاکستان کې تېر کړی دی.</p>
<p style="text-align: justify;">سرچینې لیکلي چې دغه بنسټ باید په داسې حال کې داسې خلکو ته مرسته ورسوي چې د توکو له کمښت سره مخ دي.</p>
<p style="text-align: justify;"></p>
<p style="text-align: justify;"></p>
