د افغانستان بانک د بانکونو ترمنځ د راکړې ورکړې نوی سیسټم پرانیست

کابل (پژواک، ۳۰ لړم ۱۴۰۲): د مالیې وزارت وایي، د افغانستان بانک د بانکونو ترمنځ د راکړې ورکړې (اداینو) نوی سیسټم پرانیستی او په دې سره به په بانکي برخو کې لا ډېره روڼتیا، چټکتیا او اسانتیا رامنځته شي.

مالیې وزارت پر خپله اېکس‌پاڼه لیکلي چې دغه سیسټم ای‌سي‌اېس‌اېس نومېږي چې د دغه وزارت افمېس او سیکتاس او د افغانستان بانک د سي‌بي‌اېس له سیسټمونو سره په اسانۍ نښلېدای شي.

سرچینې لیکلي چې دغه سیسټم په نړۍوالو سټنډرډونو برابر دی او بشپړ امنیتي خوندیتوب لري.

سرچینه دغه راز وايي چې د مالیې وزارت د ملي عوایدو، دولتي کارکوونکو ته د معاشونو اجرا‌ او بانکي برخو لپاره به مثبتې پایلې ولري او په اړوندو برخو کې به لا ډېره روڼتیا، چټکتیا او اسانتیا رامنځته کړي.