<p style="text-align: justify;">تالقان (پژواک، ۶ لېندۍ ۱۴۰۲): د تخار ولایت د تالقان ښاروالۍ د ښار د واټونو پراخوالي او د ډېرې ګڼېګوڼې مخنیوي لپاره د څه باندې ۱۴ میلیونه افغانیو په لګښت د دغه ښار د تفصیلي پلان پلې کولو چارې پیل کړې.</p>
<p style="text-align: justify;">د تالقان ښاروال قاري نقيبالله محمدالله د دې پروژې د پرانيستې پر مهال وويل چې د تالقان ښار د تفصیلي پلان تطبیق د دې ادارې په څه باندې ۱۴ میلیون افغانیو په لګښت پرانيستل شو چې پر بنسټ به يې تالقان ښار پراخ شي او د ډېرې ګڼېګوڼې مخه به هم ونیول شي.</p>
<p style="text-align: justify;">د هغه په وينا، د دې پروژې د کار له پيلېدو سره به د تالقان ښار د بدخشان بندر له مخکنۍ څلورلارې د تېلو فروشۍ تر څلورلارې درې – درې متره دواړو غاړو ته پلې لارې له عمومي سړک سره زیاتیږي چې وروسته به یې د قیراچونې کار هم پیل شي.</p>
<p style="text-align: justify;">د تالقان ښاروال زیاتوي چې دا پروژه شاوخوا دوه کیلومتره اوږدوالی لري چې تر راتلونکو څلورو میاشتو به بشپړه او ګټې اخیستنې ته وسپارل شي.</p>
<p style="text-align: justify;">د تخار د ښار جوړونې رییس محمدحنیف مختار وايي، د تالقانو ښار ماسټرپلان د محمد داوودخان د واکمنۍ پر مهال جوړ شوی و، خو عملي نه شو او د دغه ښار دواړو غاړو ته غځېدلي سړکونه غصب شوي وو چې اوس د تفصیلي پلان په پرانیستلو سره هماغه د محمد داوودخان د وخت ماسټرپلان پلې کېږي.</p>
<p style="text-align: justify;">هغه زياته کړه چې د دغه ماسټرپلان په پلې کېدو سره به د سړک دواړه غاړې پراخې شي او دغه راز په تالقان ښار کې زرغونه فضا هم په پام کې نيول شوې ده.</p>
<p style="text-align: justify;">د هغه په خبره، هغه مهال د تالقان ښار نفوس ٦٠ زره کسان اټکل شوى و چې اوس په دغه ښار کې له ٣٠٠ زرو ډېر وګړي ژوند کوي او د دغه ښار پراختيا ته اړتيا وه.</p>
<p style="text-align: justify;">د تخار د اطلاعاتو او فرهنګ ریيس مولوي ذبيحالله انصار پر دې سربېره چې یادو پروژو له پلې کېدو خوښي څرګندوي، خو ټينګار کوي چې خلک بايد د ښاري فرهنګ مراعاتولو ترڅنګ د دغه ډول پروژو په تطبیق کې له حکومت سره همکاري وکړي.</p>
<p style="text-align: justify;">په همدې حال کې، د تخار یو شمېر اوسېدونکي هم د ټولګټو پروژو له پیله هرکلی کوي.</p>
<p style="text-align: justify;">د تخار اوسېدونکی وسیم رسولي وايي، د دغو ډول پروژو پلې کېدل د تالقان ښار د ښکلا ترڅنګ، د دې لامل کېږي چې خلک د حکومت ترڅنګ ودریږي.</p>
<p style="text-align: justify;">هغه ټینګار کوي چې حکومت باید د لا ډېرو عامالمنفعه پروژو د پلي کولو لپاره جدي هڅې وکړي او چارې یې چټکې کړي.</p>
<p style="text-align: justify;">د تالقان بل اوسېدونکى محمدخان وايي، دغه ښار د بزکشۍ په میدان بدل شوى، ګڼهګوڼه ډېره ده، خلک له ستونزو سره مخ دي، خو اوس د دغه پلان په عملي کېدو سره به خلکو ته اسانتياوې برابرې شي.</p>
