بامیان (پژواک، ۸ لېندۍ ۱۴۰۲): د بامیان ځایي مسوولین وایي چې د دغه ولایت په مرکز کې د اته میلیون افغانیو په لګښت ۸۰۰ متره سړک جوړ او ګټې اخیستنې ته وسپارل شو.
د یادې پروژې مسوول انجنیر عبدالطیف پژواک خبري اژانس ته وویل چې د دغه ولایت د مرکز اړوند «طولواره» سیمه کې د اته میلیون او ۲۴۰ زره افغانیو په لګښت د څه د پاسه ۸۰۰ متره فرعي سړک د جوړولو چارې نن بشپړې شوې.
د هغه په خبره، دغه فرعي سړک چې ۸۱۰ متره اوږدوالی او ۵ متره سور لري په اساسي ډول د (UNOPS) په مالي ملاتړ جوړ شوی دی.
نوموړي وویل، دا سړک له درېیو میاشتو په کمه موده کې بشپړ شوی چې د سیمې شاوخوا ۳۶۰ کسانو ته په کې د کار زمینه برابره شوې وه.
دغه راز د بامیان والي مولوي عبدالله سرحدي د دې پروژې د ګټې اخیستنې په مراسمو کې وویل، دغه ولایت کې د سولې او امنیت تینګېدو سره د بیارغونې او پرمختګ زمینه برابره شوې ده.
هغه خلکو ته ډاډ ورکړ چې د اسانتیاوو رامنځته کولو او د ښاري امکاناتو برابرولو په موخه، ځایي اداره هڅه کوي چې دغه ولایت کې د موسسو په مرسته لا ډېرې پرمختیایي پروژې پلې کړي.
بلخوا، د سیمې اوسېدونکي ښاري خدماتو ته د لاسرسي په موخه د داسې پروژو تطبیق مهم بولي.
د سیمې یوه اوسېدونکي محمددین په دې اړه وویل چې مخکې د دې سیمې خلک د سړک د خاموالي او د چاپېریال د ککړتیا له امله له ګڼو ستونزو سره مخ وو.
د هغه په خبره، د یادې پروژې په ګټې اخیستنې سره د خلکو ستونزې حل او ښاري خدماتو ته یې لاسرسی پیدا کړی دی.
GET IN TOUCH
NEWSLETTER
SUGGEST A STORY
PAJHWOK MOBILE APP