اسعداباد (پژواک، ۸ لېندۍ ۱۴۰۲): د کونړ په ناړۍ ولسوالۍ کې د غځېدلي سیند دواړو خواوو ته پراته یو شمېر خلک وايي چې پر سیند د پلونو نشتوالي له امله په تګ راتګ کې له ستونزو سره مخ وي او له حکومته غوښتنه کوي چې دې ستونزې ته یې رسېدنه وکړي.
د دې ولسوالۍ د مرکزي کلي اوسېدونکي او قومي مشر عبدالستار پژواک خبري اژانس ته وویل: «زموږ په سیمه کې څلور د لرګیو جوړ کیبلې پلونه دي، خو له بده بخته چې پر دغو پلونو باروړونکي موټر تګ راتګ نه شي کولای، ځایي خلک په ډېرو ستونزو خپلې ورځنۍ اړتیاوې پوره کوي.»
هغه زیاته کړه، ناړۍ ولسوالۍ کې لږ تر لږه ۱۵۰ زره خلک ژوند کوي چې ډېر یې د سیند شاوخوا ډیورنډ کرښې ته څېرمه مېشت دي او د کېبلي پلونو له لارې د ولسوالۍ مرکز او نورو سیمو ته تګ راتګ کوي.
د یادې ولسوالۍ د مچمڼي کلي اوسېدونکی محمدجلال بیا وایي، که څه هم د پخواني او اوسني نظام له مسوولینو یې بار بار د کانګریټي پلونو جوړېدو غوښتنه کړې خو تر اوسه عملي اقدام نه دی شوی.
نوموړي وویل: «ناړۍ ولسوالۍ د کونړ یوه له ګڼنفوسه ولسوالي ده خو خلک یې لا هم د ژوند له لومړنیو اسانتیاوو بېبرخې دي، موږ په ډېر کړاو په لرګینو پلونو چې هره شېبه یې د غورځېدو وېره وي، تګ راتګ کوو.»
هغه له حکومته غوښتنه وکړه چې په دې ولسوالي کې د خلکو اړتیاوو ته په کتو ژر اساسي کانګرېټي پلونه جوړ کړي څو ځایي خلک له شته ستونزو خلاص شي.
د ناړۍ ولسوال عبدالظاهر هم په دې ولسوالۍ کې د کانګرېټي پلونو اړتیا تاییدوي او په خبره یې، په کېبلي پلونو تګ راتګ د ځایي خلکو ژوند له سختو ستونزو سره مخ کړی دی.
هغه پژواک ته وویل: «موږ پر ولایتي ادارې سربېره له مرکزي حکومته غوښتنه کړې څو په ناړۍ ولسوالۍ کې چې ډېره برخه خلک یې د کونړ سیند یوې او بلې غاړې ډیورنډ فرضي کرښې ته څېرمه سیمه کې ژوند کوي، کانګریټي پلونه جوړ کړي او ځايي خلکو ته د تګ راتګ برخه کې اسانتیاوې برابرې کړي.»
د دغه ولایت د ټولګټو رییس قاري قدرتالله معاذ بیا وایي، د ناړۍ ولسوالۍ په ګډون به د دغه ولایت په نورو سیمو کې هم اړتیا ته په کتو اساسي کانګریټي پلونه جوړ کړي.
هغه وایي، د کونړ پر سیند د پخواني حکومت پر مهال جوړ شوي پلونه چې ځیني اوس تخریب شوي، ډېر ژر به یې د بیارغولو په موخه عملي چارې پیل شي.
