راستنېدونکو سوداګرو او پانګوالو ته اسانتیاوې په پام کې نیول شوې دي

کابل (پژواک، ۱۲ لیندۍ ۱۴۰۲): د راستنېدونکو کډوالو ستونزو ته د رسېدنې کمېسیون، راستنېدونکو سوداګرو او پانګوالو ته د ځمکو د وېش په لټه کې دی او د هغوی لپاره یې ځینې تشویقي مالیاتي موارد په پام کې نیولي دي.

ارګ پر خپله اېکس‌پاڼه لیکلي چې د ریاست الوزرا اداري مرستیال مولوي عبدالسلام حنفي تېره ورځ کډوالو ته د رسېدنې کمېسیون د سوداګرو او صنعت‌کارو کډوالو لپاره د اسانتیاوو رامنځته کولو کمېټې له مسوول او غړو سره لیدلي دي.

د یادې کمېټې مشر او د صنعت او سوداګرۍ وزارت سرپرست نورالدین عزیزي ویلي، د دې کمېټې غړي له هیواده بهر افغان سوداګرو او صنعت‌کارانو ته د اسانتیاوو د رامنځته کولو په موخه له نورو ټولو کمېټو سره په منظمه او همغږې توګه هڅه کوي، څو افغان سوداګر او پانګوال په افغانستان کې پانګونې ته وهڅول شي.

هغه زیاته کړې، دغه کمېټه د صنعتي پارکونو د ایجاد په موخه بېرته راستنېدونکو سوداګرو او پانګوالو ته د ځمکو د وېش په لټه کې ده او د هغوی د تشویق او هڅولو په موخه ځینې مالیاتي او تشویقي موارد هم ورته په پام کې نیول شوي دي.

د ریاست الوزرا اداري مرستیال مولوي عبدالسلام حنفي هم ویلي، لازمه ده چې د یادې کمېټې غړي د بېرته راستنېدونکو کډوالو په ځانګړي ډول د سوداګرو او صنعت‌کارانو د ستونزو د حل په موخه خپلې ټولې هلې ځلې ترسره کړي.

هغه ویلي چې د اسلامي امارت رهبري سوداګرو او پانګوالو ته د هر ډول اسانتیاوو برابرولو په موخه په بهر کې له میشتو افغان سوداګرو او پانګوالو غواړي چې افغانستان کې پر خپلې پانګونې سره د هیواد په ابادۍ او پر مختګ کې ونډه واخلي.

دا په داسې حال کې ده چې له څه باندې یوې میاشتې راهیسې پاکستان د افغان کډوالو ایستلو ته زور ورکړی او ګڼ شمېر یې په زور ایستلي دي.