کابل (پژواک، ۱۷ لېندۍ ۱۴۰۲): د افغانستان پوهنې وزارت په هېواد کې د هلکانو په ښوونځیو کې د تعلیمي نیمګړتیاوو په اړه د بشري حقونو د څار بنسټ راپور رد کړی او ویلې یې دي چې دغه وزارت د پوهنې کیفیت او ودې ته جدي پاملرنه کوي.
د ملګرو ملتونو د بشري حقونو د څار سازمان تازه په یوه راپور کې په افغانستان کې د پوهنې برخه کې د نیمګړتیاوو پر شتون نیوکه کړې او ویلي یې دي چې د زدهکړو برخه کې د اسلامي امارت تګلارو نه یوازې نجونې له زدهکړو بېبرخې کړې بلکه د هلکانو زدهکړو ته یې هم زیان اړولی دی.
پوهنې وزارت د دغه راپور په غبرګون کې د یوې اعلامیې په خپرولو سره ویلي، لکه څنګه چې څرګنده ده، د پوهنې وزارت یو له بنسټیزو او مهمو دندو افغان ماشومانو ته د هېواد په ټولو برخو کې د متوازنو ښوونیزو خدمتونو وړاندې کول دي چې دغه کار له هر ډول قومي، ژبني او مذهبي تعصب پرته ترسره شوی او کېږي.
سرچینې لیکلي چې پوهنې وزارت په هېڅ صورت د ښوونځیو د نارینه زدهکوونکو د زدهکړو په اړه د بشري حقونو د څار بنسټ له راپور سره موافق نه دی او دا ډول بېبنسټه راپورونه په کلکه ردوي.
اعلامیه کې راغلي، پوهنې وزارت په دې باور دی چې د اوسنۍ نړۍ او ټېکنالوجۍ پرمختګونه د علماوو، څېړونکو او پوهانو د علمي هڅو په پایله کې رامځته شوي دي چې بنسټ یې د هر هېواد ښوونه او روزنه تشکیلوي.
د سرچینې په خبره، د افغانستان د پوهنې وزارت په مرکز، ولایتونو او ولسوالیو او ان د هېواد په لرو پرتو سیمو کې یې هم د هلکانو ښوونځیو ته جدي پاملرنه کړې ده چې ښه بېلګه یې د ښوونځیو د اداري او تدریسي چارو د ارزونې په موخه مرکز او ولایتونو ته د پوهنې وزارت د چارواکو سفرونه دي.
دغه راز یاد وزارت وايي چې د پوهنې د ریاستونو د څېړنې او څارنې ټېمونه په مرکز او ولایتونو کې په دوامدار ډول په ټولو ښوونځیو کې د زدهکوونکو د ازموینو له بهیر او د ښوودنکو د تدریس له څرنګوالي څارنه کوي.
وزارت لیکلي، که د ښوونکو او یا د ښوونځي د مسوولینو د لټۍ له امله په تدریس کې ځنډ راشي، نو د ستونزې د حل لپاره د اړوندو ولایتونو د پوهنې له ریاستونو سره په همکارۍ بیړني تدابیر نیول کېږي.
په اعلامیه کې راغلي چې په ۱۴۰۲ ښونیزو کال کې څه باندې یو میلیون او ۸ سوه زره او ۹۳ ماشومان د پوهنې وزارت ښوونځیو ته جذب شوي دي او د پوهنې وزارت په تشکیلاتو کې ۲ لکه او ۴۵ زره ښوونکي تدریس کوي چې ۹۵ زره یې ښځینه دي.
د پوهنې وزرات په اعلامیه کې راغلي، همدارنګه تراوسه هېڅ ښځینه ښوونکې له دندې منفصل او منفک شوې نه ده، معاشونه او امتیازات یې د پخوا په څېر ورکړل شوي او د هلکانو له ښوونځيو د تبدیلۍ په صورت کې هم نه دي بېکاره شوې، بلکه د نجونو په نورو ښوونځيو کې ګومارل شوې چې اوس هم تدریس کوي.
د سرچینې په وینا، پوهنې وزارت له څو کلونو راهیسې د مسلکي ښوونکو له کمښت سره مخ دی خو د ښوونکو د مسلکي پراختیا ریاست له لوري یې په ولایتونو، ولسوالیو او لرو پرتو سیمو کې برحال ښوونکو ته پېداګوژۍ برخه کې د مېتودیک سیمنارونو او ورکشاپونو په وړاندې کولو سره د هغوی د ظرفیت لوړونې زمینه برابره کړې ده.
دغه راز وزارت زیاتوي، د مسلکي ښوونکو د کمښت د حل په موخه ۱۹ زره مسلکي ښوونکي چې ټول یې د پيداګوژۍ په برخه کې لوړې زدهکړې لري، ګومارل شوي دي.
پوهنې وزارت په ښوونځیو کې د زدهکوونکو د وهل ډبولو په اړه ویلي، دغه عمل د اسلام له نظره نامناسب او ناروا دی او د منعې په اړه یې د پوهنې وزارت د مشرتابه له لوري د مرکز او ولایتونو د ټولو ښوونځیو ادارو ته جدي خبرداری ورکړل شوی دی.
په اعلامیه کې راغلي، که د هېواد په ښوونیزو مرکزونو کې دا ډول پېښې ولیدل شي، نو دا کار ياد وزارت د مشرتابه له امر څخه سرغړونه ده چې عاملینو ته به یې له قانون سره سم جزا ورکړل شي.
دغه وزارت له بنسټونو غوښتي چې هېواد ته راشي او د پوهنې د سکټور په ګډون په ټولو برخو کې ښه وضعیت له نږدې وګورې څو په راتلونکي کې د دغه ډول بېبنسټه او یو طرفه راپورونو مخنیوی وشي.
GET IN TOUCH
NEWSLETTER
SUGGEST A STORY
PAJHWOK MOBILE APP