اسعداباد (پژواک، ۲۵ لېندۍ ۱۴۰۲): د کونړ پوهنتون کې د ۲۷ میلیون افغانيو په لګښت د بیارغونې یو شمېر پروژې پيل او بشپړې شوې.
د کونړ سید جمالالدین افغان پوهنتون لپاره د نوې ودانۍ پرانیستې مراسمو کې د لوړ زدهکړو سرپرست وزیر مولوي ندامحمد ندیم وویل چې د دغه پوهنتون لپاره په دوو پوړونو کې نوې ودانۍ او یو کمپیوټر لېب جوړ شوي دي.
هغه وویل چې د پوهنتون پر ودانۍ ۱۷ میلیون او پر کمپیوټر لېب څلور میلیون افغانۍ لګښت راغلی دی.
د ندیم په وینا، د سید جمالالدین افغان پوهنتون کې دننه د شپږ میلیون افغانيو په لګښت د سړکونو کانګرېټولو چارې هم نن پيل شوې.
دغه راز وزیر د خپلو څرګندونو په بله برخه کې وویل چې په افغانستان کې د داعش او نورو وسلهوالو د فعالیت لپاره ځای نشته خو څوک چې دغه ډول فعالیتونه کوي باید له منځه یووړل شي.
هغه دغه راز زیاته کړه، که څوک د خدمت موخه لري، د خدمت لپاره اسلامي امارت دا مهال ښه چتر چمتو کړی دی.
ورته مهال د سید جماالدین افغان پوهنتون ريیس پوهنمل محبالله محب وویل، د دغه پوهنتون لپاره د لیلیې ودانۍ جوړولو چارې د تېر حکومت پر مهال پيل شوې وې خو تر اوسه نیمهکاره پاتې ده او بېرته نه دي پیل شوې.
هغه وویل: «د اسعداباد ښار کوچنی دی او د محصلینو لپاره مناسب ځای نشته چې د لیلیې په توګه ترې ګټه پورته کړو، په کار ده چې زموږ پوهنتون د لیلې ودانۍ چې ۸۵ سلنه چارې یې بشپړې شوې، نیمګړې هغه یې هم بشپړې شي څو د محصلینو شته ستونزې حل شي.»
هغه وویل، د پوهنتون اداره ژمنه ده چې د اسلامي امارت له پالیسۍ سره سم په ښه او لوړ فکر ځوانان ټولنې ته د خدمت لپاره وړاندې کړي.
