له تاجکستان سره د وارداتي برېښنا تړون د یوه بل کال لپاره نوی شو

<p style="text-align: justify;">کابل (پژواک، ۶ مرغومی ۱۴۰۲): د افغانستان برېښنا شرکت وايي چې له تاجکستان سره یې د وارداتي برېښنا تړون د ۲۰۲۴ کال لپاره تمدید کړ.</p>

<p style="text-align: justify;">د برېښنا شرکت نن پر خپله اېکس‌پاڼه لیکلي، د افغانستان د برېښنا شرکت عمومي اجرائیوي رییس ملا محمدحنیف حمزه په ترکیه کې د تاجکستان برېښنا سهامي شرکت له رییس محمدعمر عسازاده سره په لیدنه کې د ۲۰۲۴ کال لپاره د برېښنا پېرودلو تړون لاسلیک کړ.</p>

<p style="text-align: justify;">سرچینې زیاته کړې، د دې لیدنې په ترڅ کې دواړو لورو له تاجکستانه افغانستان ته د ۵۰۰ کیلوولټ برېښنا د نوي انتقالي مزي غځولو په اړه هم خبرې وکړې او تاجکستان د دغه مزي غځولو په اړه لېوالتیا وښوده.</p>

<p style="text-align: justify;">دغه شرکت ویلي، په دې لیدنه کې د افغانستان برېښنا شرکت مشرتابه له تاجکستان هېواد څخه وغوښتل چې «کاسا زر» پروژه بېرته پیل او د پلې کولو برخه کې یې له افغانستان سره همکاري وکړي چې په پایله کې مقابل لوري د همکارۍ ډاډ ورکړ.</p>

<p style="text-align: justify;">دغه راز، د برېښنا شرکت ویاند حمکت‌الله میوندي پژواک ته وویل چې د دغه تړون له مخې به تاجکستان افغانستان ته له ۱۰۰ تر ۱۲۰ میګاواټه برېښنا ورکوي.</p>

<p style="text-align: justify;">نوموړي وویل چې دغه برېښنا به له عمومي شبکې سره وصل شي او د شمالي ولایتونو ترڅنګ به د هېواد نورو برخو ته هم ورکړل شي.</p>

<p style="text-align: justify;">دا په داسې حال کې ده چې د روان کال د لېندۍ په ۲۳مه هم د افغانستان برېښنا شرکت له ازبکستان سره د وارداتي برېښنا تړون د ۲۰۲۴ کال لپاره تمدید کړ.</p>

<p style="text-align: justify;"></p>

<p style="text-align: justify;"></p>