کابل (پژواک، ۱۰ مرغومی ۱۴۰۲): د افغانستان برېښنا شرکت وایي، له ترکمنستان سره یې د وارداتي برېښنا د پېر تړون د ۲۰۲۴ زېږدیز کال تر پایه وغځاوه.
د افغانستان برېښنا شرکت نن پر خپله اېکسپاڼه لیکلي چې د دغه شرکت عمومي اجرائیوي رییس ملا محمدحنیف حمزه او ورسره مل پلاوي ترکمستان ته په خپل دوه ورځني سفر کې د دغه هېواد د انرژۍ له وزیر انناګلدي سپروف او د ترکمنستان د برېښنا شرکت (ترکمن انرگو) له اجرائیوي رییس دوردي الیاسوف او نورو چارواکو سره لیدلي دي.
د سرچینې معلوماتو له مخې، په دې ناسته کې افغان لوري له ترکمنستاني چارواکو سره د ۲۰۲۴ کال لپاره د برېښنا تړون لاسلیک کړ.
د افغانستان برېښنا شرکت وایي چې د دغه تړون پر بنسټ به په څلورو مسیرونو کې د اندخوی، اقینې، بادغیس او تورغونډۍ ـ هرات مزو له لارې په ساعت کې تر ۱،۸ میلیارد کیلوواټ برېښنا تورید کړي.
سرچینه زیاتوي: «د جوزجان له مرکز شبرغانه بیا د کابل تر ارغندۍ پورې د برېښنا ۵۰۰ کیلوولټ مزي لېږد چارو بشپړېدو – چې یوه اونۍ مخکې پیل شوې، په دغه لین کې له ترکمنستانه د ډېرې برېښنا د پېر ډاډ هم ترکمن لوري ته ورکړل شو.»
دغه راز سرچینه لیکي چې په یاده لیدنه کې د هرات د نورالجهاد سبسټېشن پروژه چې تړون یې د برېښنا او ترکمن انرګو شرکتونو ترمنځ لاسلیک شوی، هر اړخیزې خبرې وشوې او له ترکمن انرګو غوښتنه وشوه چې د یاد سبسټېشن چارې هر څو ژر بشپړې کړي.
په خبرپاڼه کې راغلي چې د افغانستان برېښنا شرکت عمومي اجرائیوي رییس په دې لیدنه کې د ترکمنستان له هر اړخیزو همکاریو مننه وکړه او ویې ویل چې افغانستان تر بل هر وخت اوس د دغه هېواد همکاریو او ملاتړ ته اړتیا لري.
دا په داسې حال کې ده چې د افغانستان برېښنا شرکت د روان کال د لېندۍ په ۲۳مه له ازبکستان او د روانې مرغومي میاشتې په ۶ مه له تاجکستان سره د وارداتي برېښنا تړونونه د یوه بل کال لپاره نوي کړل.
