<p style="text-align: justify;">کابل (پژواک،۱۴ مرغومی ۱۴۰۲): د امر بالمعروف او نهی عنالمنکر وزارت وایي، ځينې ښځې چې په اسلامي ټولنه کې یې بېحجابي خپروله د ښځينهوو پولیسو له خوا نیول شوې دي.</p>
<p style="text-align: justify;">د یادونې ده، د کابل ښار ځيني اوسېدونکي وایي چې دې وروستیو ورځو کې، ځينې ښځې د شرعي حجاب نه مراعتولو له امله د امربالمعروف او نهی عنالمنکر وزارت د محتسبینو له خوا په دشت برچي او تایمني سیمو کې نیول شوې دي.</p>
<p style="text-align: justify;">د کابل ښار د دشت برچي سیمې یوې اوسېدونکې چې مستعار نوم یې نازیه دی، پژواک ته وویل: «تېرو دوو ورځو کې امربالمعروف او نهی عنالمنکر وزارت ځينې هغه ښځې له کورسونو او واټونو نیولي چې حجاب یې نه و مراعات کړی.»</p>
<p style="text-align: justify;">د نازیې خور چې د دې سیمې په یوه کورس کې د انګلیسي ژبې پر زدهکړې بوخته ده، وایي: «محتسیبنو هغه نجونې نیولي چې کوبای پتلونونه یې په تن کړي وو.»</p>
<p style="text-align: justify;">هغې زیاته کړه: «محتسبینو یادې نیول شوې ښځې او نجونې یوه نا معلوم ځای ته لېږدولې دي.»</p>
<p style="text-align: justify;">ورته وخت کې د کابل ښار د تایمني سیمې یوه اوسېدونکي د نوم نه اخیستو په شرط وویل چې په دې سیمه کې د څو داسې قضیو شاهد دی چې بېحجابه ښځې نیول شوې دي.</p>
<p style="text-align: justify;">د امربالمعروف او نهی عنالمنکر وزارت ویاند او د اطلاعاتو او نشراتو رییس مولوي عبدالغفار فاروق د دغه خبر په تایید سره نن (پنجشنبه د مرغومي ۱۴مه) پژواک خبري آژانس ته وویل: «هو یو شمېر ښځې چې په اسلامي ټولنه کې یې بېحجابي خپروله، اسلامي ارزښتونه یې تر پښو لاندې کړي وو او زموږ باعفته ښخې یې بېحجابۍ ته هڅولې د ښځینهوو پولیسو له خوا نیول شوې دي.»</p>
<p style="text-align: justify;">هغه وویل: «نیول شوې ښځې به له څېړنو وروسته یا قضایي ارګانونو ته ورپېژندل شي او یا به په کلک ضمانت سره خوشې شي.»</p>
<p style="text-align: justify;">خو د امربالمعروف او نهی عنالمنکر او د شکایتونو اورېدو وزارت ویاند په اړه چې ښځې یوه نامعلوم ځای ته انتقال شوې، وویل: «دا خبرې چې ښځې یوه نامعلوم ځای ته لېږدول شوې دي ردوم، حقیقت نه لري، بلکې اړوندو حوزو ته لېږدول شوې دي.»</p>
<p style="text-align: justify;">نوموړي وویل: «زموږ هغه خوېندې چې شرعي حجاب مراعتوي له هغو سره هیڅ ستونزه نه لرو.»</p>
<p style="text-align: justify;">مولوی عبدالغفار وایي چې افغانستان یو اسلامي هېواد دی، ۹۹ سلنه وګړي یې مسلمانان او دین دوسته دي، د منکراتو او بېحجابۍ مخالف دي.</p>
<p style="text-align: justify;">هغه وویل: «د اسلامي امارت له بیا حاکمېدو شاوخوا دوهنیم کاله تېریږي، د امر بالمروف او نهی عنالمنکر وزارت محتسبینو خلکو ته په مرکز او ولایتونو کې د معروفاتو د تطبیق، له منکراتو څخه په ډډه کولو او په ځانګړي ډول د حجاب په مراعتولو سپارښتنې کړې دي.»</p>
<p style="text-align: justify;">نوموړی وایي: «زموږ محتسبینو په لومړي سر کې خلکو ته د منکراتو او د منکراتو د ډولونو په اړه معلومات ورکړل، بیا یې په شفاهي او په نرمه لهجه څو ځلي خلکو ته سپارښتنې کړي، خو له بدمرغه لیدل کېږي چې ځيني خلک د محتسبینو د دغو سپارښتنو په مقابل کې بې غوري کوي او په هغو عمل نه کوي، بالاخره زموږ محتسبینو شرعي مکلفیتونو ته په کتو اقدامات وکړل څو د هغوی مخه ونیسي.»</p>
<p style="text-align: justify;">دا په داسې حال کې ده چې نن دغه وزارت په یوه غږیز پیغام کې کابل ښار کې په کورسونو کې له ښځینهوو زدهکوونکو او استادانو غوښتي چې شرعي حجاب دې جدي مراعات کړي.</p>
<p style="text-align: justify;"></p>
<p style="text-align: justify;"></p>
