[restrict paid="true"]
<p style="text-align: justify;">کندهار (پژواک، ۱۸ مرغومی ۱۴۰۲) د کندهار امنیتي مسوولین وایي چې د دغه ولایت سپینبولدک ولسوالۍ اړوند په دوستمحمد کلي کې د نشهيي توکو یوه فابریکه کې اورلګېدني له امله یو کس مړ او درې نور ټپیان شوي دي.</p>
<p style="text-align: justify;">د سپینبولدک امنیه قوماندان مولوي محمود وایي، دغه پېښه نن (دوشنبه) له غرمې وروسته شاوخوا دوه بجې شوې ده.</p>
<p style="text-align: justify;">هغه زیاته کړه، د نشهيي توکو دې فابریکې پټ فعالیت درلود.</p>
<p style="text-align: justify;">د نوموړي په خبره، په پېښه کې درې کسان سوځېدلي او یو کس مړ شوی دی، سوځېدلي کسان د کندهار میرویس حوزوي روغتون ته لېږدول شوي او روغتیايي وضعیت یې د اندېښنې وړ بلل شوی دی.</p>
<p style="text-align: justify;">د سپینبولدک امنیه قوماندان وایي، د دې فابریکې مالک له سیمې په تېښه بریالی شوی خو امنیتي کسانو یې په اړه پلټنې پیل کړې څو ونیول شي او قضايي ارګانونو ته یې وسپاري.</p>
<p style="text-align: justify;">د کندهار په ځينو ولسوالیو کې د نشهيي توکو دې ته ورته فابریکې چې مخکې یې فعالیت درلود، د امنیتي کسانو له خوا له منځه وړل شوې دي.</p>
[/restrict]
