کابل (پژواک، ۱۹ مرغومی ۱۴۰۲): د ریاستالوزراء اقتصادي معاونیت وایي، د ملي تدارکاتو کمېسیون له لوري د شاوخوا لس میلیارد افغانیو په ارزښت ۲۴ بېلابېلې پروژې منظور شوې چې په پلې کېدو به یې زرګونو کسانو ته د کار زمینه برابره شي.
د ریاستالوزراء اقتصادي معاونیت په خبرپاڼه کې راغلي چې نن د ریاستالوزراء مرستیال ملا عبدالغني برادر په مشرۍ د ملي تدارکاتو کمېسیون نوبتي غونډه جوړه شوه.
سرچينې لیکلي چې یادې غونډې ته ۲۷ پروژې د بحث لپاره وړاندې شوې چې له جملې یې د ۲۴ پروژو قراردادونه منظور او د درېیو پروژو قراردادونو ارزونې په موخه ملي تدارکاتو ریاست او اړوندو وزارتونو ته دنده وسپارل شوه څو دغه قراردادونه په هر اړخیز ډول وڅېړي او راپور یې د ملي تدارکاتو کمېسیون له مشرتابه سره شریک کړي.
خبرپاڼه کې راغلي، منظور شوې پروژې د ملي دفاع، کورنیو چارو، ټولګټو، مخابراتو او معلوماتي ټکنالوجۍ، عامې روغتیا، اوبو او برېښنا وزارتونو، د افغانستان برېښنا شرکت او کابل ښاروالۍ اړوند دي چې ټولیز ارزښت یې شاوخوا لس میلیارده افغانیو ته رسېږي.
اقتصادي معاونیت لیکلي چې په یادو منظور شوو پروژو کې د پارنده پنجشېر د مایکرو هایدل برېښنا بند جوړولو، زابل ولایت کې د توري بند د پاتې چارو بشپړولو، په کابل ښار کې د ځینو مهمو سړکونو اساسي جوړونې، په بېلابېلو ولایتونو کې هېوادوالو ته د برېښنا رسولو، پر ښارونو سربېره په لرو پرتو سیمو کې هېوادوالو ته د باکیفیته او چټکو انټرنېټي خدمتونو وړاندې کول او یو شمېر نورې پروژې شاملې دي چې په پلې کېدو به یې زرګونو هېوادوالو ته کاري فرصتونه برابر شي.
