<p style="text-align: justify;">پلعلم (پژواک، ۲۸ مرغومی ۱۴۰۲): د لوګر د صنعت او سوداګرۍ ریاست مسوولین وایي، د دغه ولایت محمداغې ولسوالۍ صنعتي پارک د لومړي فاز چارې بشپړې شوې دي او په راتلونکي نوي کال کې به پانګوالو ته د صنعتي پارک د ځمکې وېش پيل شي.</p>
<p style="text-align: justify;">د لوګر د صنعت او سوداګرۍ رییس شبیراحمد صدیقي پژواک خبري اژانس ته وویل، د محمداغې ولسوالۍ صنعتي پارک چې په ۵۰۰ جریبه ځمکه کې په دوه فازونو کې جوړېږي، د لومړي فاز چې ۲۵۰ جریبه ځمکه کېږي، چارې بشپړې شوې دي او ځمکه یې پانګوالو ته د وېش لپاره چمتو شوې ده.</p>
<p style="text-align: justify;">صدیقي دغه راز زیاته کړه: «۴.۹۵ کیلومتره سړک، د ۲۸۰ جریبه ځمکې هوارول، د ژورو څاهګانو کیندنه، د اوبو رسونې د پایپونو غځول، برېښنا رسونه، احاطوي دېوال او د برېښنا ستنې هغه څه دي چې په دغه صنعتي پارک کې یې کارونه بشپړ شوي دي.»</p>
<p style="text-align: justify;">هغه دغه راز وویل، د هېواد بېلابېلو پانګوالو ورته د ځمکې ترلاسه کولو وړاندیزونه کړي او یو جریب ځمکه به پانګوالو ته د ۳۰ زره امریکایي ډالرو په بدل کې ورکړل شي.</p>
<p style="text-align: justify;">د لوګر یوه اوسېدونکي رحمتالله پژواک ته وویل، حکومت ته په کار ده چې د دغه صنعتي پارک د جوړولو چارې چټکې کړي.</p>
<p style="text-align: justify;">هغه وویل، د محمداغې ولسوالۍ د صنعتي پارک موقعیت ته په کتو به لسګونه فابریکې دغلته فعالیت وکړي او سلګونه وزګارو کسانو ته به د کار زمینه برابره شي.</p>
<p style="text-align: justify;">د لوګر د محمداغې ولسوالۍ صنعتي پارک د بنسټ ډبره په ۱۳۹۴ هجري شمسي کال کې په ۵۰۰ جریبه ځمکه کې اېښودل شوې وه او د ولایتي چارواکو په خبره د چارو له بشپړېدو وروسته به دغلته شاوخوا ۲۰۰ فابریکې فعالیت وکړي.</p>
<p style="text-align: justify;"></p>
<p style="text-align: justify;"></p>
