د افغانستان په اړه د دوحې دویمه مشورتي غونډه؛ ا.ا ته هم بلنه ورکړل شوې

[restrict paid="true"]

اټلانټا (پژواک، ۵ سلواغه ۱۴۰۲): د ملګرو ملتونو په سرپرستۍ د قطر پلازمینې دوحه کې د افغانستان په تړاو د کېدونکې دویمې مشورتي غونډې نېټه په ډاګه شوه، بلخوا د ریاست الوزرا سیاسي مرستیال وايي چې په یاده ناسته کې اسلامي امارت ته هم د ګډون بلنه ورکړل شوې.

له ارګه د سلواغې په ۵مه، په یوه خپره شوې خبرپاڼه کې راغلي چې افغانستان لپاره د ناروې سرپرست سفیر پال کلومان د ریاست الوزراء له سیاسي مرستیال مولوي عبدالکبیر سره دلیدنې پر مهال د دوحې د دویمې غونډې په اړه معلومات ورکړي دي.

پال کلومان په یاده لیدنه کې ویلي چې په نړۍ کې پر روان کړکېچ سربېره افغانستان له نړۍ څخه نه دی هېر شوی او د راتلونکې فبرورۍ میاشتې پر ۱۸ نېټه به په دوحه کې د افغانستان په تړاو نړۍواله غونډه ترسره شي.

سرچینې ویلي، مولوي عبدالکبیر په دې لیدنه کې له ناروې او نورو اروپايي هېوادونو څخه غوښتنه وکړه، چې په کابل کې خپل سفارتونه پرانېزي او فعالیت ته دوام ورکړي.

د ریاست الوزراء سیاسي مرستیال دغه راز ویلي، د دوحې په راتلونکې ناسته کې اسلامي امارت ته هم بلنه ورکړل شوې او ټینګار یې وکړ، چې اسلامي امارت د ښځو او نجونو د تعلیم مخالف نه دی او په دې اړه د امارت د مشر په هدایت ځانګړې کمېټه کار کوي څو تعلیم ته زمینه برابره کړي.

بلخوا، د ملګرو ملتونو د عمومي سرمنشي ویاند هم ویلی، چې د دغه سازمان په کوربه توب به د راتلونکې فبرورۍ میاشتې په ۱۸ او ۱۹ مه د قطر پلازمینه دوحه کې د افغانستان په اړه دویمه مشورتي غونډه جوړه شي.

د امریکا غږ د خبر له مخې، دوجاریک چې په نیویارک کې یې خبري غونډې ته وینا کوله وویل چې د دوحې په دې غونډه کې به د افغانستان لپاره د یو شمېر هیوادونو ځانګړي استازي او د سیمه ییزو سازمانو استازي برخه واخلي.

د ملګرو ملتونو د عمومي منشي د ویاند د وینا له مخې د دغې غونډې د جوړیدو په اړه کار لا روان دی.

بلخوا، د بشري حقونو د څار سازمان د ښځو د چارو مرستیالې هیدر بار د دوحې په غونډه کې د افغان مېرمنو د استازو پر ګډون باندې ټینګار کړی او د ملګرو ملتونو څخه یې غوښتي چې په دې را روانه غونډه کې دې افغان میرمنو ته په پشپړ ډول د ګډون امکانات برابر کړي.

دا په داسې حال کې ده، چې افغانستان لپاره د اروپایي ټولنې سفیرې دوه ورځې مخکې د کورنیو چارو وزارت له سرپرست سراج‌الدین حقاني سره د افغانستان لپاره دوحه کې د جوړېدونکې غونډې په اړه خبرې کړې وې.

د یادونې ده چې د ۲۰۲۳ زیږدیز کال په می میاشت کې هم د ملګرو ملتونو لخوا  د افغانستان په تړاو لومړۍ مشورتي غونډه شوې، خو د افغانستان سرپرست حکومت ته پکې بلنه نه وه ورکړل شوې.

ملګرو ملتونو د دوحې د غونډې هدف له افغانستان سره د تعامل په اړه د نړیوالې ټولنې یو ګډ تفاهم ته لاس رسی ښودلی وو.

د ملګرو ملتونو په کوربتوب افغانستان لپاره د یو شمیر هیوادونو د ځانګړو استازو په لومړۍ غونډه کې د چین، فرانسې، جرمني، هند، اندونیزیا، ایران، جاپان، قزاقستان، قرغیزستان، ناروی، پاکستان، قطر، روسیې، سعودي عربستان، تاجیکستان، ترکیې، ترکمنستان، متحده عربي امارات، بریتانیا، امریکا متحده ایالاتو، اوزبیکستان، اروپايي ټولنې او د اسلامي همکاریو سازمان استازو ګډون کړی وو.

د دوحې په غونډه کې د بشري حقونو په ځانګړي ډول د ښځو او نجونو حقونو، ټولشموله حکومت جوړیدل، تروریزم او نشه يي توکو سره د مبارزې په اړوند مسلو خبرې شوې وې.

[/restrict]