<p style="text-align: justify;">کابل (پژواک، ۷ سلواغه ۱۴۰۲): سیمهییز مسوولین وایي، په فراه کې له ۲۴۰ کورنیو سره د خوراکي توکو او پنجشېر کې له ۵۷۲ کورنیو سره نغدي مرستې وشوې.</p>
<p style="text-align: justify;">د فراه د اطلاعات او فرهنګ ریاست خبرپاڼه کې راغلي چې نن د دغه ولایت په شیبکوه ولسوالۍ کې د ملګرو ملتونو د خوړو نړۍوال سازمان له لوري له ۲۴۰ بېوزلو کورنیو سره د خوراکي توکو مرسته وشوه.</p>
<p style="text-align: justify;">سرچينې لیکلي چې په دې مرستو کې هرې کورنۍ ته ۵۰ کیلوګرامه اوړه، پنځه لېتره غوړي، اووه کیلوګرامه دال او ۳۰ پاکټه د ماشومانو تقویې خواړه ورکړل شول.</p>
<p style="text-align: justify;">د یوه بل خبر له مخې، د پنجشېر د اطلاعاتو او فرهنګ رییس نصرالله ملکزاده پژواک خبري اژانس ته وویل چې د دغه ولایت په لومړۍ حصه ولسوالۍ کې د ملګرو ملتونو د بشري صندوق په مالي ملاتړ له ۵۷۲ کورنیو سره نغدي مرسته وشوه.</p>
<p style="text-align: justify;">د هغه د معلوماتو له مخې، په دې مرسته کې هرې کورنۍ ته ۲۴۱۳۰ افغانۍ ورکړل شوې.</p>
<p style="text-align: justify;"></p>
