<p style="text-align: justify;">جلالاباد (پژواک، ۱۰ سلواغه ۱۴۰۲): د ننګرهار پوهنې رياست وايي چې د دې ادارې اړوند پر هغې ۴۵ جریب ځمکه د مېوو باغ جوړوي چې تازه له غصبه راګرځول شوې ده.</p>
<p style="text-align: justify;">مسوولین وايي، دا ځمکه د باغ جوړولو لپاره يوه خصوصي شرکت ته په اجاره ورکړل شوې ده.</p>
<p style="text-align: justify;">د ننګرهار د پوهنې رييس مفتي حبيب حضرت حقاني د سلواغې په ۱۰مه د دغه باغ جوړولو چارو پرانیستې پر مهال وويل چې دا ځمکه پخوا يو شخص ته په قرارداد ورکړل شوې وه چې بيا هغه ډېر وخت دولت ته د اجارې کلنی حق نه تحويلاوه.</p>
<p style="text-align: justify;">د حقاني په وينا، ياده ۴۵ جريبه ځمکه چې د پوهنې رياست اړوند ده، له غصبه خلاصه شوې او د سهاک کرنيز شرکت ته يې د پنځو کلونو لپاره د اجارې په قراراداد ورکړې ده.</p>
<p style="text-align: justify;">دی وايي، دغه شرکت به هر کال د يو جريب ځمکې پر سر ۳۲۰۰ افغانۍ اجاره ورکوي چې د کال شاوخوا يو ميليون افغانۍ کېږي او پخوا دا ځمکه يوازې د کال په ۲۱ زره او ۵۰۰ افغانۍ اجاره ورکړل شوې وه.</p>
<p style="text-align: justify;">بل پلو، د قراردادي شرکت يو مسوول عبدالله وايي، دوی به پر دې ځمکه د تازه مېوو باغ جوړوي چې ۳۵۰۰ نیالګي په کې ایښودل کېږي او خلکو ته به په کې د تفريح زمينه هم برابره شي.</p>
<p style="text-align: justify;">د نوموړي په خبره، دغه راز به دوی په دې ځمکه کې ګڼو کسانو ته د لنډمهال او اوږدمهال کار زمينه هم برابره کړي.</p>
<p style="text-align: justify;">له دې وړاندې هم په ننګرهار کې ډېرې دا ډول ځمکې چې پخوا په ډېر کم قرارداد ورکړل شوې وې او بيا د قراردادي (اجاره دار) له خوا غصب شوې وې، د ولايتي ادارو له خوا بېرته له غصب خلاصې شوې دي.</p>
