اروزګان کې د لومړي ځل لپاره د ووشو سیالۍ ترسره شوې

<p style="text-align: justify;">ترینکوټ (پژواک، ۱۴ سلواغه ۱۴۰۲): د اروزګان په مرکز ترینکوټ کې د کلبونو ورزشکارانو ترمنځ په لومړي ځل د ووشو سیالۍ ترسره شوې.</p>

<p style="text-align: justify;">یادې سیالۍ نن (د سلواغې ۱۴مه) د اروزګان په مرکز ترینکوټ کې د ووشو فدراسیون او د اطلاعات او فرهنګ ریاست له خوا پیل شوې وې.</p>

<p style="text-align: justify;">اروزګان کې د ووشو فدراسیون مسوول شفیع‌الله محمدي وایي، د ولایت په کچه دغو یو ورځنیو سیالیو کې د څلورو کلبونو لسګونو لوبغاړو برخه اخیستې وه او په پایله کې «ممتاز» لوبډلې اتلولې خپله کړه.</p>

<p style="text-align: justify;">محمدي زیاته کړه، دا سیالۍ د منتخبې لوبډلې غواروي لپاره وې او له دې وروسته به بریالي کسان د ولایت په استازولۍ په مرکز او نورو ولایتونو کې سیالۍ ترسره کوي.</p>

<p style="text-align: justify;">د اروزګان د اطلاعاتو او فرهنګ رییس قاري اغاولي قریشي دا ډول سیالۍ د ځوانانو ترمنځ د یووالي او ښې روغتیا لپاره مهمې بولي.</p>

<p style="text-align: justify;">هغه له ځوانانو وغوښتل چې ورزش ته په مخه کولو سره د نشه‌یې توکو کارولو په ګډون له داسې کړنو ډډه وکړي چې ټولنې ته پر زیان تمامېږي.</p>

<p style="text-align: justify;">ورته مهال، په دې سیالیو کې برخه اخیستونکي لوبغاړي خوښ دې چې په لومړي ځل د هغوی د غواروي لپاره ولایتي سیالۍ ترسره کېږي.</p>

<p style="text-align: justify;">د مصطفی په نوم یوه لوبغاړي وویل، د سیالیو په پایله کې د لوړ مقام ګټونکي کسان به له دې وروسته د اروزګان په استازولۍ په نورو ولایتونو کې لوبې ترسره کوي.</p>