کابل (پژواک، ۱۹ سلواغه ۱۴۰۲): د کابل ښاروالۍ وايي چې په تورخم کې د څه باندې ۱۶ میلیون افغانیو په لګښت له پاکستانه افغانستان ته د بېرته راستنو شوو افغان کډوالو لپاره د عمري پنډغالي د احاطې جوړولو چارې بشپړې شوې.
کابل ښاورالۍ د خبرپاڼې په خپرولو سره لیکلي، له پاکستانه هېواد ته د بېرته راستنو شوو افغان کډوالو لپاره په تورخم سیمه کې د عمري پنډغالي د احاطې جوړولو چارې بشپړې شوې او د کابل ښاروالۍ د ښاري خدمتونو او چاپېریال ساتنې مرستیال مولوي محمدخالد سجستاني له لوري پرانیستل شو.
په خبرپاڼه کې راغلي، یاد پنډغالی په ۲۳۸،۶۳ خریبه ځمکه کې د کابل ښاروالۍ د انجنیرانو له لوري ډیزاین شوی او د بېلابېلو ادارو، ملي سوداګرو او بهرنیو موسسو په مرسته چې په هغه کې د ژوند ټولې اړتیاوې په پام کې نیول شوې، له پاکستانه د بېرته راستنو شوو افغان کډوالو سره د مرستې په موخه جوړ شوی دی.
سرچینه زیاتوي، د دغه پنډغالي احاطه د ۵۰۳۲ مترو په اوږدوالي او ۳،۲ مترو په لوړوالي سره د کابل ښاروالۍ له لوري د اریانا جوهرشرکت په مرسته له جال او ۲۵۰۳ اوسپنیزو ستنو په ګټه اخیستلو د څه باندې ۱۶ میلیون افغانیو په لګښت جوړ شوې ده.
دا په داسې حال کې ده چې د راپورونو له مخې، افغان چارواکو ويلي، د تېر ۲۰۲۳ زېږدیز کال له اکتوبر میاشتې را وروسته له پاکستانه شاوخوا ۵۰۰ زره افغانان په زور راایستل شوي او دا لړۍ لا هم روانه ده.
Visits: 105
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن