فراه کې د نیالګیو اېښودو کمپاین پیل شو

[restrict paid="true"]

فراه‌ښار (پژواک، ۲۱ سلواغه ۱۴۰۲): د فراه د کرنې، اوبولګولو او مالدارۍ رياست له لوري د دغه ولایت په مرکز او ولسوالیو کې د نيالګيو اېښودو کمپاين پیل شو.

د فراه د اطلاعات او فرهنګ ریاست وایي چې د دغه کمپاين په ترڅ کې به د دې ولايت د مرکز په ګډون په ټولو ولسواليو کې ۶۴ زره مېوه‌لرونکي او بې‌مېوې نيالګي کېښودل شي.

سرچینې زیاته کړې، د شنې فضا رامنځته کول نه يوازې طبيعت ښکلی کوي، بلکې د هوا پاکېدو او ناروغیو په مخنیوي کې هم ګټور تمامېږي.

یاد ریاست وایي، هيڅوک حق نه لري چې په خپلسري توګه په دغه ولايت کې ځنګلونو ته زيان ورسوي، بلکې د نيالګيو په اېښودو، ساتنه او پالنه کې دې هر سړی سهم واخلي.

[/restrict]