<p style="text-align: justify;">کابل (پژواک، ۲۶ سلواغه ۱۴۰۲): د اذربایجان سفیر کابل کې د خپل هېواد سفارت پرانیستلو په اړه د یاد هېواد د بهرنیو چارو وزارت رسمي لیک د افغانستان د بهرنیو چارو وزارت سرپرست ته وړاندې کړ.</p>
<p style="text-align: justify;">د افغانستان د بهرنیو چارو وزارت ویاند عبدالقهار بلخي نن پر خپله <a href="https://twitter.com/QaharBalkhi/status/1757962099957932067">اېکس</a> پاڼه لیکلي، د اذربایجان جمهوریت سفیر الهام محمدوف د ا.ا.ا. د بهرنیو چارو وزارت سرپرست مولوي امیرخان متقي سره تعارفي ناسته کړې ده.</p>
<p style="text-align: justify;">سرچینې لیکلي، دغه ناسته کې د اذربایجان سفیر کابل کې د سفارت پرانیستلو په اړه د دغه هېواد د بهرنیو چارو وزارت رسمي لیک د افغانستان د بهرنیو چارو وزارت سرپرست ته وړاندې کړ.</p>
<p style="text-align: justify;">سرچینې زیاته کړې، ناسته کې د افغانستان او اذربایجان ترمنځ د دیپلوماټیکو اړیکو پر پیل، اقتصادي همکاریو او ګڼو نورو موضوعاتو خبرې اترې وشوې.</p>
<p style="text-align: justify;">سرچینه زیاتوي، مقتي کابل کې په لومړي ځل د اذربایجان جمهوریت د سفارت پرانیسته او د سفیر په کچه د دیپلوماټ رالېږل دوو اړخیزو اړیکو کې مهم پرمختګ وباله او دا یې د افغانستان او اذربایجان د دوستۍ ښه نښه یاده کړه.</p>
<p style="text-align: justify;">متقي د افغانستان او اذربایجان اړیکې تاریخي وبللې او د یاد هېواد سفیر ته یې د هرکلي ترڅنګ ډاډ ورکړ چې د افغانستان اسلامي امارت د بهرنیو چارو وزارت چمتو دی چې کابل کې د دغه هېواد سفارت سره لازمه مرسته وکړي.</p>
<p style="text-align: justify;">متقي دغهراز زیاته کړه د لاجوردو لار افغانستان لپاره ځانګړی اهمیت لري او د دې دهلیز له فعالېدو سره افغانستان له اروپا سره نښلېدلای شي.</p>
<p style="text-align: justify;">متقي دغهراز وویل چې اسلامي امارت غواړي په باکو کې د افغانستان سفارت کې د دیپلوماټیک حضور کچه لوړه کړي.</p>
<p style="text-align: justify;">سرچینه لیکي، ناسته کې د اذربایجان سفیر وویل، هېواد یې د افغانستان حاکمیت او خپلواکۍ ته درناوی لري او د افغانستان په کورنیو چارو کې لاسوهنه نه کوي.</p>
<p style="text-align: justify;">د یاد هېواد سفیر زیاته کړې، دا په تاریخ کې لومړی ځل دی چې د دغه هېواد سفارت کابل کې پرانیستل کېږي.</p>
<p style="text-align: justify;">نوموړي د امنیت، ثبات، نشهيي توکو پر ضد د مبارزې او اقتصادي پرمختګونو په اړه د افغانستان د حکومت لاستهراوړنې وستایلې.</p>
<p style="text-align: justify;">هغه زیاتوي، د دواړو هېوادونو ترمنځ په ګڼو برخو کې د همکاریو ښه ظرفیتونه شته چې کولای شي د دواړو هېوادونو په ګټه ثابت شي.</p>
<p style="text-align: justify;">د بهرنیو چارو وزارت مرستیال ویاند حافظ ضیا احمد تکل پژواک خبري اژانس ته وویل، دا لومړی ځل دی چې د اذربایجان سفارت کابل کې پرانیستل کېږي او د سفارت د پرانیستلو لیک یا باور لیک یې متقي ومانه او د یاد هېواد پلازمېنه باکو کې د افغانستان سفارت شته.</p>
