جلالاباد (پژواک، ۳ کب ۱۴۰۲): د ننګرهار امنيه قومانداني وايي، د روانې اونۍ له شنبې تر اوسه د دغه ولایت په یو شمېر ولسواليو کې ۷۰ جريب کوکنار اړول شوي دي.
د مسوولينو په وينا، تېره اونۍ په دغه ولايت کې د اسلامي امارت د رهبرۍ د پرېکړې له مخې، د کوکنارو اړولو کمپاين پيل شوی چې ټولو ولسواليو کې به کرل شوي کوکنار له منځه يووړل شي.
د ننګرهار امنيې قوماندانۍ وياند عبدالبصير زابلي پژواک خبري اژانس ته وویل، تېره اونۍ د دغه ولايت په سرهرود، اچين، سپينغر، شينوارو، خوږياڼو، پچيراګام، شېرزادو او چپرهار ولسواليو کې امنیتي ځواکونو د کوکنارو اړولو کمپاينونه ترسره کړي دي.
دی زياتوي چې د دغو کمپاينونو په پايله کې شاوخوا ۷۰ جريبه ځمکه باندې کرل شوي کوکنار له منځه يووړل شول او لا هم د کوکنار اړولو کمپاين روان دی.
د ننګرهار کروندګر وايي، تېر کال هم د امنيتي ځواکونو له خوا کوکنار اړول شوي وو نو ځکه سږ کال کوکنار کم کرل شوي دي.
د ننګرهار د خوږياڼو ولسوالۍ د کږې سيمې يوه اوسېدونکي بشرمل پژواک ته وويل، تېر کال ته په کتو کروندګرو کوکنار نه دي کرلي، په ځينو لرو پرتو سيمو، د کلاګانو په منځ او داخل کې کوکنار کرل شوي چې هغه هم د ولسوالۍ منسوبينو له منځه وړي دي.
په تېر کې ننګرهار یو له هغو ولايتونو و چې په زياته اندازه کوکنار په کې کرل کېدل.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن