د امو سیند حوزې د نفتو ورځني استخراج کچه ۱۳۵۰ ټنو ته لوړه شوې ده

کابل (پژواک، ۹ کب ۱۴۰۲): د افغانستان د کانونو او پټرولیم وزارت وايي چې د امو سیند حوزه کې د شپږو نوو څا‌ګانو په فعالېدو سره د نفتو ورځني استخراج کچه یو زر او ۳۵۰  ټنو ته لوړه شوې ده.

د کانونو او پټرولیم وزارت ویاند همایون افغان نن پر خپله اېکس‌پاڼه لیکلي، د امو سیند نفتي حوزه د هېواد په په درېیو شمالي ولایتونو (سرپل، جوزجان او فاریاب) کې شاملېږي چې د قشقري بلاک له پنځلسو، د انګوت بلاک له شپږو او د اق دریا له درېیو څا‌ګانو د ورځې یو زر او ۳۵۰  ټنه نفت استخراجېږي.

سرچینې ویلي، د شپږو نوو څاګانو په فعالېدو د امو سیند نفتي حوزه کې د فعالو څاګانو شمېر ۲۴ ته رسېدلی دی.

د هغه په وینا، د یادو نفتو استخراج او تصفیه د هېواد دننه د خصوصي سکټور له لوري ترسره کېږي.

سرچینې زیاته کړې چې امو سیند نفتي حوزه کې د سړکونو، ودانیو او نفتي زېرمو جوړولو ترڅنګ په بېلابېلو سیمو کې دوه او درې بعدي سروې هم روانه ده.

افغان څرګنده کړې، په پام کې ده د ۲۰۲۴ میلادي کال تر پایه به په قشقري کې ۱۲ څا‌ګانې، په زمردسای کې اته، په بازار کمي کې یوه او په اق دریا کې دوه څاه‌ګانې وکيندل شي چې په دې سره به د فعالو څا‌ګانو شمېر ۴۷ ته لوړ شي او ورځنی استخراج به یې ۳۰۰۰ ټنو نفتو ته ورسېږي.

د سرچینې د معلوماتو له مخې، اوس مهال د امو سیند حوزه کې ۱۵۰۰ کسان په مستقیم او غیرمستقیم ډول په کار بوخت دي چې کاري ساحه یې ورځ تر بلې پراخېږي او کاري فرصتونه نور هم ډېرېږي.

دا په داسې حال کې ده چې د کانونو او پټرولیم وزارت د روان لمریز کال د سلواغې په لسمه د شاوخوا ۲۵،۵ میلیون ډالرو په ارزښت د امو سیند حوزې ۶۰ زره ټنه خام نفت د پروسس لپاره د داوطلبۍ له لارې یوه کورني شرکت ته ورکړل.