<p style="text-align: justify;">کابل (پژواک، ۲۴ کب ۱۴۰۲): د صنعت او سوداګرۍ وزارت سرپرست د ازبکستان د بهرنیو چارو له وزیر سره د دواړو هېوادونو ترمنځ د سوداګریزو ستونزو د حل او د ازبکستان له خاورې د افغان سوداګریزو توکو د ټرانزیټي تعرفو کمولو په اړه خبرې کړې دي.</p>
<p style="text-align: justify;">د افغانستان د صنعت او سوداګرۍ وزارت نن پر خپله <strong><a href="https://twitter.com/MoICAfghanistan/status/1768163947482374463">اېکس</a>پاڼه</strong> لیکلي چې د یاد وزارت سرپرست نورالدین عزیزي د ازبکستان د بهرنیو چارو له وزیر بختیار سعیدوف سره لیدلي.</p>
<p style="text-align: justify;">سرچینه زیاتوي، په دغه لیدنه کې دواړو لورو د سوداګرۍ ټرانزیټ، د پانګونې پراختیا، د دواړو هېوادونو ترمنځ د سوداګریزو ستونزو د حل، د افغانستان د ټرانزیټي توکو لپاره د لا ډېرو اسانتیاوو برابرولو او د ازبکستان له خاورې د افغان سوداګریزو توکو د ټرانزیټي تعرفو کمولو په اړه خبرې وکړې.</p>
<p style="text-align: justify;">د سرچینې د معلوماتو له مخې، یاده لیدنه کې پرېکړه وشوه چې په نږدې راتلونکي کې به د اړوندو ادارو مسوولين مزارشريف ښار کې د دواړو هېوادونو ترمنځ د سوداګرۍ او ټرانزيټ پراختيا پر وړاندې د شته خنډونو لرې کولو په موخه جلا غونډه وکړي.</p>
<p style="text-align: justify;">دا په داسې حال ده چې د ازبکستان د بهرنیو چارو وزیر د افغانستان رییسالوزراء اقتصادي مرستیال، اداري مرستیال او د بهرنیو چارو وزارت سرپرست سره هم لیدلي او پر بېلابېلو موضوعاتو یې خبرې کړې دي.</p>
