<p style="text-align: justify;">ترینکوټ (پژواک، ۲۴ کب ۱۴۰۲): د ترینکوټ ښاروالي وايي چې د ترینکوټ ښار یو شمېر دوکانونه یې په روژه کې د ګرانپلورنې له امله تړلي دي.</p>
<p style="text-align: justify;">د ترینکوټ ښاروال قاري هدایتالله هدایت پژواک خبري اژانس ته وویل، د ښاروالۍ د نرخونو د کنټرول او څارنې کمېټې د ښار په بېلابېلو برخو کې تر ۳۰ ډېر دوکانونه تړلي دي.</p>
<p style="text-align: justify;">هغه زیاته کړه، د روژې له رارسېدو سره سم ترینکوټ ښاروالي د خوراکي او غیرخوراکي توکو لپاره ټاکلې نرخپاڼې وېشلې دي.</p>
<p style="text-align: justify;">هغه وویل، د کمېټې ترڅنګ یې په ښار کې یو شمېر نورو کسانو ته هم دنده سپارلې چې په پټه د توکو بیو څارنه وکړي او سرغړونکي یې د ښاروالي ځانګړې کمېټې ته وروپېژني.</p>
<p style="text-align: justify;">نوموړی زیاتوي، نرخپاڼې د ټولنیزو رسنیو له لارې له ښاریانو سره شریکوي او له هغوی غوښتنه کوي چې د سرغړوني په صورت کې پر پاڼه له لیکل شوو شمېرو سره اړیکه ونیسي.</p>
<p style="text-align: justify;">ورته مهال، د ترینکوټ ښار اوسېدونکي خوښ دي چې د ښاروالي له لوري توکو ته بیې ټاکل شوې او له سرغړوونکو سره قانوني چلند کېږي.</p>
<p style="text-align: justify;">د ترینکوټ ښار یو اوسېدونکی عبدالولي وايي، یو شمېر هټۍوالو د روژې په رارسېدو سره د توکو بيې دوه برابره لوړې کړې دي.</p>
<p style="text-align: justify;">هغه له مسوولینو غواړي چې د نرخونو کنټرول پروسې ته دوام ورکړي او له سرغړوونکو سره قانوني چلند وکړي.</p>
