ننګرهار پوهنتون کې دیوه خیریه بنسټ لخوا د ۱۵ مېلیونه افغانیو په لګښت څېړنیز مرکز جوړېږي

[restrict paid="true"]

جلال اباد (پژواک، ۴ وری ۱۴۰۲): د ننګرهار ولایت  پوهنتون کې د شهید افسرخان خیریه بنسټ  لخوا د ۱۵ میلیونه افغانیو په لګښت د لومړي ځل لپاره د یوه علمي څېړنیز مرکز د جوړېدو پرانېسته وشوه.

ددغه ولایت د اطلاعاتو او فرهنګ ریاست لخوا د وري په ۴مه، په یوه خپره شوې خبرپاڼه کې راغلي چې په دې مناسبت جوړه شوې غونډه کې د شهید افسر خان کورنۍ مشر او د ننګرهار د سوداګرۍ او پانګونې خونې مدیره پلاوي غړي حاجي باز محمد افسرزي او عنایت الله افسرزي، د شهید افسر خان خیریه بنسټ مشر نبي الله باز د ننګرهار پوهنتون رئیس شیخ انعام الله مدني، مخکیني رئیس ډاکټر خلیل الرحمن بهسودوال او ځایي مسوولینو برخه اخیستې وه.

د ننګرهار پوهنتون پخواني رییس بهسودوال وویل، څېړنیز مرکزونه د پوهنتونو لپاره د ملا د تېر حیثیت لري او زیاته یې کړه د دې مرکز په جوړېدو سره به د څېړنې برخه کې د زده کړیالانو ستونزې حل شي.

د یاد پوهنتون د علمي چارو مرستیال پوهندوی احسان الله ناصح وویل، دغه علمي مرکز د شهید افسر خان کورنۍ د ۱۵ مېلیونه افغانیو په مالي لګښت جوړېږي.

د نوموړي په خبره، د علمي څېړنیز مرکز د نشتون له کبله زده کړیالان له ګڼو ستونزو سره مخامخ دي او د دې مرکز په جوړېدو سره به د ساینسي او زراعت برخو زده کړیالانو ستونزې حل او خپلې څېړنې به پکې په اسانۍ سره وکړي.

ناصح په علمي برخه کې دا د هېواد لپاره یوه ستره او اړینه لاسته راوړنه وبلله او له شهید افسر خان کورنۍ یې مننه وکړه، چې د هېواد د بچیو د علمي سویې لوړېدا په موخه یې د دغې څېړنیز مرکز د جوړېدو چارې په خپل مالي لګښت پیل کړې.

د شهید افسر خان کورنۍ مشر حاجي باز محمد افسرزي وویل،  د ودانۍ جوړېدو ټولې ۱۵ مېلیونه افغانۍ د دوی د کورنۍ له لوري ورکول کېږي او د ودانۍ له جوړېدو وروسته به تر ۵ مېلیونه نورو افغانیو په لګښت څېړنیز مرکز په اړینو وسایلو سمبال کړي، څو زده کړیالانو ته د علمي څېړنې لپاره لازم سهولتونه برابر شي.

د یادې پروژې مسوول انجنیر شېر شاه شینواري وویل، د څېړنیز مرکز لپاره دغه ودانۍ پر ۳۰۰ متره مربع ځمکه درې پوړونو کې په لوړ کیفیت جوړېږي، چې یوه تاکاو به هم ولري.

ورته مهال د ننګرهار پوهنتون زده کړیالانو د مرکز په جوړېدو خوښي څرګنده کړه او ویې ویل د علمي څېړنې په برخه کې له ستونزو سره مخ دي او لاس رسی ورته نه لري.

دوی د شهید افسر خان له کورنۍ مننه وکړه، چې په خپل مالي لګښت ورته څېړنیز مرکز جوړوي.

د زده کړیالانو په خبره د دغې مرکز په جوړېدو سره به یې ستونزې حل او خپلې علمي څېړنې به په اسانۍ سره ترسره کړي.

[/restrict]