کابل (پژواک، ۱۳ وری ۱۴۰۳): د ازبکستان د اوسپنې پټلۍ ادارې مرستیال وایي، هېواد یې غواړي چې د ریلي تعرفو په ۵۰ سلنه کمښت سره د افغانستان د ریل پټلۍ له لارې انتقالات ډېر کړي او ترانزیټي بهیر ته وده ورکړي.
د افغانستان د اوسپنې پټلۍ ادارې نن پر خپله اېکس پاڼه لیکلي، د دې ادارې عمومي رییس او مل پلاوي پرون په کابل کې د ازبکستان هېواد د ریل پټلۍ ادارې له مرستيال حمکتالله رحمتاوف او مل پلاوي سره د دوه اړخيزو ریلي همکاريو د پراختيا په تړاو خبرې وکړې.
سرچینې ویلي، په دې لیدنه کې د افغانستان د اوسپنۍ پټلۍ ادارې عمومي رییس ملا بختالرحمن شرافت د ازبکستان د ریل پټلۍ ادارې مرستیال او پلاوي ته د ښه راغلاست ترڅنګ وویل: «خوښ يو چې افغانستان د يو ښه ګاونډي په توګه له ازبکستان هېواد سره دوه اړخيزه ریلي همکارۍ لري.»
سرچینه زیاتوي، په دغه لیدنه کې د ازبکستان د اوسپنې پټلۍ ادارې مرستیال حمکتالله رحمتاوف وویل چې هېواد یې غواړي د افغانټرانس په څېر د سترو ریلي پروژو په تطبیق کې ځانګړې ونډه واخلي.
نوموړي زياته کړه، د دې ترڅنګ ازبکستان غواړي د ریلي تعرفو په ۵۰ سلنه کمښت سره د افغانستان د ریل پټلۍ له لارې انتقالات زيات کړي او ترانزیټي بهير ته وده ورکړي.
د اوسپنۍ پټلۍ ادارې ویلي، له ازبکستان څخه راغلي پلاوي ژمنه وکړه چې د حيرتان- مزارشريف مسیر په نايباباد سټيشن کې به د تازه ميوو او سبزيجاتو لپاره د تخليې او بارګيرۍ په موخه مجهز ساتنځای هم جوړ کړي، څو د افغانستان تازه مېوه او سبزيجات له ځنډ او خرابوالي پرته منځنۍ اسيا، اروپا او نورو هېوادونو ته صادر شي.
د یادونې ده چې د وري په لسمه په کابل کې د روسیې د اوسپنې پټلۍ ادارې مرستیال هم د افغانستان د اوسپنې پټلۍ ادارې عمومي ریيس ملا بختالرحمن شرافت سره په لیدنه کې ویلي وو چې دوی د هرات – بولدک او افغانټرانس د ریل پروژو کې هر ډول همکارۍ ته چمتو دي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن