اروزګان کې د اختر ورځو امنیت ټینګښت په موخه د ګډو ځواکونو ګارنیزیون جوړ شو

ترینکوټ (پژواک، ۱۶ وری ۱۴۰۳): د اروزګان په مرکز ترینکوټ ښار کې د اختر شپو او ورځو کې د امنیت د لا ټینګښت په موخه د ګډو ځواکونو دوه سوه کسیز ګارنیزیون جوړ شو.

د اروزګان د اطلاعات او فرهنګ رییس قاري اغاولي قریشي وايي، په ترینکوټ ښار کې د لا ډاډمن امنیت په موخه د ګډو ځواکونو دوه سوه کسیز ګارنیزیون چې د ټولو امنیتي او دفاعي ارګانونو سرتېرې په‌کې شامل دي، د کوچني اختر په شپو او ورځو کې به د ښار، میله ځایونو، عیدګاه، جامع مسجدونو او د میله‌والو د امنیت مسوولیت ولري.

هغه چې نن یې په همدې موخه رسنیو ته معلومات ورکول، وویل، د ګارنیزیون سرتېرو ته لارښوونه شوې، هغه څوک چې ښار او میله ځایونو کې خپلسري فعالیتونه ترسره کوي، د خلکو د زوروني سبب کېږي او یا هم د تورو ښیښو لرونکي وسایط ګرځوي، ونیسي او قانوني چلند ورسره وکړي.

ورته مهال، د ترینکوټ ښار اوسېدونکي خوښ دي چې د دوی د امنیت په موخه ځانګړي ځواکونه په دندو ګمارل کېږي.

 محمدابراهیم چې د ترینکوټ ښار یو اوسېدونکی دی، وايي، د پخوا په نسبت اوس امنیتي حالت ښه دی، خو د تازه جوړ شوي ګارنیزیون په مرسته به تر ډېره د هغو خپلسریو مخنیوی هم وشي چې میله‌والو د زوروني سبب کېږي.

هغه غوښتنه کوي چې ښار کې دې د هغو موټرونو او موټرسایکلونو ګرځېدو مخه هم ونیول شي چې ښیښې یې تورې وي، یا په‌‌کې د لوړ غږلرونکي هارنونه نصب شوي وي.