فاریاب او پنجشېر کې د جلا پېښو له امله درې کسان مړه او دوه نور ټپيان شوي

میمنه، پاراخ (پژواک،۱۹ وری ۱۴۰۳): امنیتي سرچینې وايي چې په فاریاب او پنجشېر ولایتونو کې د جلا پېښو له امله درې کسان مړه او دوه نور ټپيان شوي دي.

د فاریاب د پولیسو مطبوعاتي دفتر د یوې خبرپاڼې په استولو ویلي چې پرون د خیبر ولسوالۍ په کلدار کلي کې یو ۱۳ کلن ماشوم له خپلو همځولو د تفریح لپاره غره ته تللی و چې له غره لوېدلی او ژوند یې له لاسه ورکړی دی.

سرچینې زیاته کړې چې تېره ورځ د قیصار ولسوالۍ په نهرین پله سیمه کې د یوه خاور بنز موټر او موټرسایکل ترمنځ د ټکر له امله موټرسایکل‌چلوونکی مړ شوی دی.

په خبرپاڼه کې راغلي چې د خاور بنر موټر چلوونکی په توقیف کې دی.

دغه راز، سرچینې ویلي چې تېره ورځ د قیصار ولسوالۍ د بوري سیمې دوه اوسېدونکي په کورنۍ شخړه کې ټپیان شوي چې د دې قضیې په تړاو یو کس نیول شوی دی.

بلخوا، نامعلومو کسانو په پنجشېر کې یو ځوان په ډزو وژلی دی.

د پنجشېر د امنیې قوماندانۍ ویاند عابدالله عقاب پژواک خبري اژانس ته وویل چې دغه کس نور اغا نومېده او تېر شپه ۹:۳۰ بجې د دغه ولایت په ابشار ولسوالۍ کې په ډزو وژل شوی دی.

هغه زیاته کړه، تر اوسه د دې پېښې لامل نه دی معلوم خو په اړه یې د پولیسو پلټنې روانې دي.