د افغانستان بانک راتلونکې شنبې ۱۶ میلیون امریکایي ډالر لیلاموي

کابل (پژواک، ۳۰ وری ۱۴۰۳): د افغانستان بانک اعلان کړی چې د راتلونکې اونۍ د شنبې په ورځ ۱۶ میلیون امریکایي ډالر د داوطلبۍ له لارې لیلاموي.

د افغانستان بانک دغه څرګندونې نن (پنجشنبې د وري ۳۰مه) پر خپله اېکس‌پاڼه کړې دي.

یاد بانک له سوداګریزو بانکونو، د صرافۍ او پولي خدمتونو له شرکتونو چې په شرایطو برابر وي، غوښتي چې په دې داوطلبۍ کې ګډون وکړي.

سرچینې زیاته کړې، د داوطلبۍ ګټونکي اړ دي څو خپل حسابونه د لیلام ورځې تر پایه تصفیه کړي.

سرچینه زیاتوي، د اسعارو د لیلام په داوطلبۍ کې د معاملاتو قسمي تسویې ته اجازه نه ورکول کېږي، د داوطلبۍ ګټونکي اړ دي چې د خپل ذمت د قیمت پیسې په یو ځل، په نغدي ډول په ټاکلي موده کې د افغانستان بانک ته وسپاري.

دا په داسې حال کې چې د افغانستان بانک د روانې وري میاشتې په ۱۸مه هم ۱۵ میلیون امریکایي ډالر د داوطلبۍ له لارې لیلام کړي وو.