بامیان (پژواک، ۳ غویی ۱۴۰۳): د بامیان ورزشي مسوولین وایي چې دغه ولایت کې د سیمهییزو او دودیزو لوبو ودې په موخه د ۱۲ ټیمونو ترمنځ د تیږې اچونې او رسۍکشولو سیالۍ ترسره شوې.
د بامیان د بدنې روزنې او ورزش امر سید کفیل موسوي پژواک ته وویل، د ۱۲ ټیمونو او لسګونو ګډونکوونکو ترمنځ د ځایي ورزشونو سیالۍ د دغه ولایت په مرکز کې ترسره شوې.
د هغه په خبره، دغو ځایي ورزشونو کې چې د رسۍکشول او تیږي اچونه شامل وو، نن د بدني روزنې امریت له لوري په دوو پړاونو کې د ۱۲ لوبډلو ترمنځ او د لسګونو نورو کسانو په ګډون ترسره شوې.
نوموړي په ټولنه کې د ځایي او دودیزو لوبو دودول د دغو سیالیو د ترسره کېدو موخه یاده کړه او ویې ویل، د بدني روزنې امریت هڅه کوي څو د داسې سیالیو ترسره کېدو او دودولو زمینه د دغه ولایت په ټولو ولسوالیو کې برابره شي.
دا په داسې حال کې ده چې د بامیان اوسېدونکو د داسې سیالیو له ترسره کېدو هرکلی کړی او په ټولنه کې د ځایي لوبو د دودولو غوښتنه کوي.
د بامیان یوه اوسېدونکي محمد امین وویل، د نوو ورزشونو په دودولو سره پخواني ورزشونه د له منځه تلو په حال کې دي، اوسنیو شرایطو کې ډېر کم ځوانان له سیمهییزو لوبو سره لېوالتیا لري.
د هغه په خبره، په تېر کې دغه ولایت کې رسۍ کشولو، غېږې نېونې، ډبرې اچونې، وزلوبو، غورسي او نورو ځایي ورزشونو ډېر پلویان لرل چې اوس لږ لږ نوو لوبو د هغو ځای نیولی دی.
نوموړی وایي، د داسې سیالیو ترسره کول پخوانی فرهنګ بیا معرفي کوي، مسوولین دې هڅه وکړي څو فرهنګي ارزښتونه بېرته په ټولنه کې دود کړي.
