<p style="text-align: justify;">فیضاباد (پژواک، ۱۹ غویی ۱۴۰۳): د بدخشان په مرکز فیضاباد ښار کې د «عالیست، افغانیست» په نوم د سیمهییزو محصولاتو او لاسي صنایعو نندارتون جوړ شو.</p>
<p style="text-align: justify;">په دغه درې ورځني نندارتون کې چې د بدخشان د صنعت او سوداګرۍ ریاست له خوا جوړ شوی، په څه باندې ۶۰ غرفو کې د بدخشان او ګاونډو ولایتونو محصولات او لاسي صنایع نندارې ته اېښودل شوي دي.</p>
<p style="text-align: justify;">د بدخشان مرستیال والي قاري امین الله طیب د یاد نندارتون پرانیستې پر مهال وویل: «موږ د بدخشان د صنعتکارانو له اقدامه ملاتړ کوو او غوښتنه ترې کوو چې خپل محصولات د هېواد او نړۍ بېلابېلو برخو ته صادر کړي، څو هېوادوال له بېوزلۍ راووځي او د نورو هېوادونو په څېر پر ځان بسیا شي.»</p>
<p style="text-align: justify;">د بدخشان د صنعت او سوداګرۍ ریاست د سوداګرۍ امر عبدالباطن ظاهري وایي چې فیضاباد ښار کې د لاسي صنایعو نندارتون د درېیو ورځو لپاره په جلا ډول د ښځو او نارینهوو دواړو پر مخ پرانیستی وي چې په هغو کې ۶۰ متشبثینو خپل محصولات او لاسي صنایع په غرفو کې نندارې ته ايښي دي.</p>
<p style="text-align: justify;">هغه وویل، دغه پروګرام په ملي او نړۍوالو مارکېټونو کې د لاسي صنایعو پېژندنې او ودې په موخه تر سره شوی، د صنعت او سوداګرۍ اداره به د هغو د پراخېدو په موخه هر اړخیزه هڅه وکړي.</p>
<p style="text-align: justify;">بلخوا، د بدخشان د اطلاعاتو او فرهنګ رییس انجنیر ذبیحالله امیري دغه ولایت د بومي لاسي صنایعو برخه کې د هېواد له غني ولایتونو یاد کړ.</p>
<p style="text-align: justify;">نوموړی وایي، د ورېښمو تانونو چمتو کول او له هغو د ویاړ جامو په توګه استفاده، نیمڅی اوبدنه، ټغر جوړول، جاکټاوبدنه او کلالي چې اوس هم د زیباک په یوه کلي کې جوړېږی، دا په خپله بدخشان کې د لاسي صنایعو مخینه ښيي، خو ملي او نړۍوال مارکېټ ته کم معرفي شوي چې باید ملي او نړۍوال نندارتونونو ته وړاندې کړای شي.</p>
<p style="text-align: justify;">د بدخشان یو مسګر عبدالجبار وایي: «له ۲۷ کلونو راهیسې تر دمګړۍ د فیضاباد ښار په پل جوز سیمه کې بدخشاني اوسېدونکو ته د مسي لوښو په جوړولو بوخت یم، چایجوشې، ګوزې، پتنوس او داسې نور لوښي جوړوم، د دې ترڅنګ چې ښه عاید لرم، د مسګرۍ فرهنګ مې هم ژوندی ساتلی دی.»</p>
<p style="text-align: justify;">بدخشان کې د غالۍ اوبدنې یوې کارخونې مالک ظاهر نوري د لاسي صنایعو ودې په موخه د مسوولینو د پاملرنې هرکلی کړی او وایي، د سیاسي بدلونونو په لومړیو کې د بدخشان په یوې ولسوالۍ کې یې یوه نمایندهګي درلوده خو اوس د فیضاباد ښار په ګډون درېیو ولسوالیو کې خپلې کارګاوې لري او هغو کې لسګونو کسانو ته د کار زمینه برابره شوې ده.</p>
<p style="text-align: justify;">هغه له خلکو غواړي چې د اقتصادي ودې په موخه له داخلي محصولاتو استفاده وکړي څو صنعتکاران پر ځان بسیا شي.</p>
