کابلوف: ا.ا پر افغانستان بشپړ کنټرول لري او دا د مسکو لپاره مهمه ده

کابل (پژواک، ۱۲ غبرګولی ۱۴۰۳): د افغانستان په چارو کې د روسیې ځانګړي استازي ویلي چې اسلامي امارت پر افغانستان بشپړ کنټرول لري او دغه موضوع د مسکو لپاره ډېره مهمه ده.

د ټاس اژانس د راپور له مخې، د افغانستان لپاره د روسیې ځانګړي استازي ضمیر کابلوف دغه څرګندونې د روسیې ۲۴ ټلوېزیوني شبکې سره خبرو کې کړې دي.

نوموړي زیاته کړې: «موږ پر دې باور یو چې دغه دولت (اسلامي امارت) د هېواد (افغانستان) کلک کنټرول په لاس کې لري؛ دا زموږ لپاره ډېره مهمه ده.»

هغه باوري دی چې روسیه کولای شي د نفتي محصولاتو د صادراتو او د خوړو خوندیتوب تامین برخو کې له دغه هېواد سره همکاري وکړي.

هغه زیاته کړې: «د خوړو خوندیتوب هم د افغانستان چارواکو لپاره د همکارۍ ډېرېدو او د اړتیا وړ خوراکي توکو د تامین تضمین لپاره د [بحث] موضوع ده.»

دا په داسې حال کې ده چې د تېرې اونۍ په سه‌شنبې د روسیې ولسمشر ولادیمیر پوتین د ازبکستان په پلازمېنه تاشکند کې د یوې خبري غونډې پر مهال ویلي وو چې له اسلامي امارت سره د اړیکو جوړول مهم دي.

د هغه په وینا، اسلامي امارت افغانستان د خپل اوسني اقتدار په توګه کنټرولوي.

ورته مهال، د اسلامي امارت ویاند ذبیح‌الله مجاهد د پوتین د څرګندونو غبرګون کې پژواک خبري اژانس ته ویلي وو، په وروستیو کې د روسیې د مسوولینو خبرې مثبتې دي او د دې ښکارندویي کوي چې له اسلامی امارت سره د تعامل دروازې پرانيزي.