<p style="text-align: justify;">کابل (پژواک، ۱۷ غبرګولی ۱۴۰۳): د ټولګټو وزارت د افغانستان د اوسپنې پټلۍ له لارې د څه باندې ۱۲۰ زره متریک ټنه سوداګریزو توکو د انتقالاتو خبر ورکوي.</p>
<p style="text-align: justify;">یاد وزارت نن (د غبرګولي ۱۷مه) پر خپله اېکسپاڼه لیکلي، په دوو اونیو یعنې د روان کال د غويي له ۲۸مې څخه د جوزا تر ۱۰مې پورې د افغانستان د اوسپنې پټلۍ له لارې ۱۲۵۲۹۰ مټریک ټنه انتقالات شوي دي.</p>
<p style="text-align: justify;">سرچینه زیاتوي، د حیرتان بندر له لارې ۹۶۰۲۱ ټنه، د اقینه بندر له لارې ۱۵۶۹۵ ټنه او د تورغنډي بندر له لارې ۱۳۵۷۴ ټنه انتقالات شوي چې نفتي او غیر نفتي توکي، وچه میوه، معدني تیږې او د انارو جوس پهکې شامل دي.</p>
<p style="text-align: justify;">یاد وزارت وايي، وروستیو دوه اونیو کې د انتقالاتو له وړاندې شوو شمېرو څخه ۱۲۱۳۸ ټنه یې صادراتي توکي تشکیلوي چې ډېره برخه یې وچه میوه، معدني تیږې او د انارو جوس دي.</p>
<p style="text-align: justify;">سرچینه زیاتوي، هر څومره چې د اوسپنې پټلۍ له لارې د صادراتو او انتقالاتو اندازه زیاته شي، د کار زمینه او ملي عواید ډېرېږي او د اقتصادي ثبات، پرمختګ او ځان بسیاینې پر لور لار خلاصېږي.</p>
<p style="text-align: justify;">یاد وزارت له سوداګرو غوښتي چې خپل سوداګریز توکي په امن، ارزانه او چټکه توګه د اوسپنې پتلۍ له لارې ولېږدوي او د افغانستان د ټولګټو وزارت د اوسپنې پټلۍ معینیت له اړوندو مسوولینو سره دې په مرکز او ولایتونو کې اړیکه ونیسي.</p>
<p style="text-align: justify;">سرچینې لیکلي چې د افغانستان د ټولګټو وزارت د اوسپنې پتلۍ معینیت هڅه کوي څو سوداګرو لپاره د انتقالاتو مناسب شرایط او لا ډېرې اسانتیاوې رامنځته کړي.</p>
