<p style="text-align: justify;">ګردېز (پژواک،۲۶ غبرګولی ۱۴۰۳): پکتیا کې د نهو ولایتونو د ۷۰ لوبډلو ترمنځ د والیبال سیالۍ د حسنخېل لوبډلې په اتلولی پای ته ورسېدې.</p>
<p style="text-align: justify;">د پکتيا د بدنې روزنې او سپورټ ریيس نورالرحمن تسکين پژواک خبري اژانس ته وویل چې په يادو سیالیو کې د پکتيا په ګډون د کابل، لوګر، غزني، ميدانوردګ، خوست، کاپيسا، لغمان، ننګرهار او پکتيکا ولايتونو ۷۰ لوبډلو ګډون کړی و.</p>
<p style="text-align: justify;">هغه وايي چې دغه سیالۍ د پکتيا بدني روزنې او سپورټ رياست تر چتر لاندې د يوه سوداګر په مالي ملاتړ د واليبال د ودې او پرمختګ په موخه جوړې شوې وې چې ۵۰ ورځې يې دوام وکړ.</p>
<p style="text-align: justify;">هغه زیاته کړه چې دغه سیالۍ د حسینخېل لوبډلې په اتلولۍ پای ته ورسېدې.</p>
<p style="text-align: justify;">ورته مهال، د يادو لوبو يوه لوبغاړي بسمالله پژواک ته وويل چې يادې لوبې د واليبال د ودې لپاره مهمې وې.</p>
<p style="text-align: justify;">هغه ټینګار وکړ چې د ولایتونو د مرکزونو ترڅنګ باید په ولسواليو کې هم د سیالیو ترسره کولو امکانات برابر شي.</p>
<p style="text-align: justify;">د یادونې ده، د یادو سیالیو د لومړي مقام ګټونکې لوبډلې ته د دوه سوه زره افغانيو په ارزښت یو کرولا موټر هم ورکړل شو.</p>
<p style="text-align: justify;"></p>
<p style="text-align: justify;"></p>
<p style="text-align: justify;"></p>
