ډېکسن: له نړۍ سره د اړیکو پراخېدو کې له اسلامي امارت سره همکاري کوو

کابل (پژواک، ۱۹ زمری ۱۴۰۳): د افغانستان لپاره د بریتانیا سفارت شارژدافیر ویلي چې لندن له اسلامي امارت سره د نړۍ د اړیکو پراخېدو برخه کې همکاري کوي او غواړي د افغانانو ستونزې هوارې شي.

ارګ پر خپله اېکس‌پاڼه لیکلي، د ریاست‌الوزرا د سیاسي معاونیت د دفتر عمومي رییس مولوي ذاکر پرون د افغانستان لپاره د بریتانیا سفارت له شارژدافیر رابرټ ډېکسن سره وکتل.

سرچینې ویلي، په دې لیدنه کې ډیکسن وویل چې د اسلامي امارت او بریتانیا د سیاسي اړیکو رغېدو او مثبت تعامل لپاره هڅې کوي او په دوحه کې يې له بهرنیو ډیپلوماتانو سره د ریاست‌الوزرا د سیاسي مرستیال ناسته مثبته وبلله چې په وینا یې، ډېر مسایل په کې روښانه او اندېښنو ته ځواب وويل شو.

د بريتانیا شارژدافیر زیاته کړې، د اسلامي امارت له چارواکو سره دوامداره ناستې خورا ګټورې دي او په وینا یې، د متقابل احترام او بارو پر بنسټ شونې ده چې ستونزو ته حل لاره ولټول شي.

سرچینې ویلي، ډېکسن په افغانستان کې بشپړ امنیت او د اسلامي امارت له خوا د نشه‌يي توکو پر وړاندې مبارزه وستایله او زیاته یې کړه چې لندن هڅه کوي څو له افغانستان سره د دوحې په درېیمه ناسته کې د همکارو بنسټونو او ښکېلو اړخونو له لوري شوې ژمنې عملي شي.

نوموړي دغه راز ویلي، د نړۍ په کچه افغانان د اقلیمي بدلون له امله له ګڼو زیانونو سره مخ دي او له افغانستان سره یې په دې برخه کې د بریتانیا د تخنیکي او بشري مرستو د دوام ډاډ ورکړ.

سرچینې زیاته کړې چې ډېکسن د خپلو خبرو په پای کې په ټینګار سره وویل، لندن له اسلامي امارت سره د نړۍ د اړیکو د پراخېدو برخه کې همکاري کوي او غواړي د افغانانو ستونزې هوارې شي.

همدارنګه په دې ناسته کې د ریاست‌الوزرا سیاسي معاونیت د دفتر عمومي ریيس مولوي ذاکر د افغانستان لپاره د بریتانیا شارژدافیر ته د ښه راغلاست ترڅنګ له افغانانو سره د ياد هېواد د بشري مرستو له امله مننه وکړه.

مولوي ذاکر ویلي، له نړۍ سره تعامل او مثبتې اړیکې د اسلامي امارت د بهرني سیاست لومړیتوب دی او د افغانستان او بریتانیا ترمنځ د اړیکو مخینې ته په اشاره يې زیاته کړه چې دواړه هېوادونه د اړیکو پراختیا او تعامل لپاره ډېر فرصتونه لري او بايد ترې استفاده وشي.

نوموړي زیاته کړه، پر افغانستان لګول شوي بندیزونه د حل لاره نه ده او ډېر زیان یې عامو خلکو ته رسېږي.

مولوي ذاکر له افغانستان سره د دوحې درېیمه ناسته کې د شوو ژمنو د ژر عملي کېدو غوښتنه وکړه او زیاته یې کړه چې اسلامي امارت پر خپلو ژمنو ولاړ دی او له نشه‌يي توکو سره د اغېزناکې مبارزې لپاره یو عالي امارتي کمېسیون جوړ شوی چې د اسلامي امارت ژمنتیا په ډاګه کوي.

هغه ویلي، ا.ا چا ته ستونزې نه جوړوي او هڅه کوي د سیمې او نړۍ په کچه د متوازن بهرني سیاست په رڼا کې له ټولو اړخونو سره سیاسي او اقتصادي اړیکې ولري.

دغه راز، د ناستې په پای کې د دوه اړخیزو اړیکو د پراختیا او همکاریو په موخه له خبرو وروسته د دغو ناستو پر دوام ټینګار وشو.