<p style="text-align: justify;">مهترلام (پژواک، ۲۱ چنګاښ ۱۴۰۳): د لغمان د مرکز مهترلام اړوند د الیشنګ کلي یو شمېر اوسېدونکي وايي، د دغه کلي د برېښنا پروژې یوازې ۲۰ سلنه چارې له درېیو کلونو راهیسې نیمګړې پاتې دي چې له امله یې شاوخوا درې زره کورنۍ برېښنا نه لري.</p>
<p style="text-align: justify;">لغمان ولایت د سمیهییزو شوراګانو اتحادیې رییس او د الیشنګ کلي اوسېدونکي غلامرباني پژواک خبري اژانس ته وویل، په سیمه کې یې د مخکني حکومت په چوکاټ کې د ولسي تړون پروګرام له لارې د خصوصي سکټور پر مټ د برېښنا پروژې ۸۰ سلنه چارې سر ته رسېدلې خو پاتې لا هم نه دي بشپړې شوې.</p>
<p style="text-align: justify;">هغه زیاته کړه، دوی هغه مهال له یوه خصوصي شرکت سره قراداد کړی و چې پیسې یې نړۍوال بانک ورکولې خو د اسلامي امارت له بیا واکمنېدو وروسته یې چارې تر نن پورې په ټپه ولاړې دي.</p>
<p style="text-align: justify;">د نوموړي په خبره، په دې سیمه کې شاوخوا درې زره کورنۍ ژوند کوي چې له برېښنا محرومې دي.</p>
<p style="text-align: justify;">ورته مهال، د یاد کلي یو بل اوسېدونکی معلم عبدالحلیم وایي، په کلي کې یې د برېښنا پایې درول شوې وې، مزې یې غځول شوي وو او مېترونه او صندوقونه یې هم نصب شوي وو خو په تېرو درېیو کلونو کې تخریب شوي دي.</p>
<p style="text-align: justify;">دوی غوښتنه کوي چې اسلامي امارت دې دې پروژې پاتې چارې بشپړې کړي.</p>
<p style="text-align: justify;">خو بل لور ته بیا ځايي مسوولین وايي، ستونزه یې له مرکز سره شریکه کړې او هیله ښيي چې روان کال به یې چارې له سره پیل شي.</p>
<p style="text-align: justify;">د دغه ولایت د کلیو پراختیا او بیارغونې رییس مولوي محمدظاهر زرکمر وايي، دوی د الیشنګ کلي د اوسېدونکو او په ټوله کې د هغو خلکو د برېښنا ستونزه مني چې په مخکني حکومت کې د ولسي تړون د پروګرام له لارې یې کارونه پیل شوي وو او اوس نیمګړي پاتې دي.</p>
<p style="text-align: justify;">دی وايي، یاده ستونزه یې له وزارت سره شريکه کړې او هیلهمن دي چې روان کال کې به یې کارونه بېرته پیل شي.</p>
<p style="text-align: justify;">د هغه په خبره، د مخکني حکومت پر مهال د یادو پروژو بودجه نړۍوال بانک ورکوله خو اوس نه ورکول کېږي او د برېښنا په ګډون یې کڼې نورې پروژې هم نیمګړې پاتې دي.</p>
