د بدخشان په راغستان کې د دوو کلیو تر منځ ۳۲ کلنه دښمني پای ته ورسېده

فیض‌اباد (پژواک، ۲۱ زمری ۱۴۰۳): د بدخشان سیمه‌ییز مسوولین وايي، د دغه ولایت په راغستان ولسوالۍ کې د دوو کلیو تر منځ ۳۲ کلنه دښمني چې ۱۵ کسانو ته پکې مر‌ګ‌ژوبله اوښتې وه، پای ته ورسېده.

د بدخشان د اطلاعاتو او فرهنګ ریاست د اطلاعاتو امر حکمت‌الله محمدي وايي، پرون د لغمان امنیه قوماندان مولوي نجیب‌الله بدخشي چې د بدخشان د راغستان ولسوالۍ اصلي اوسېدونکی دی، دغه ولسوالۍ ته راغی.

نوموړي زیاته کړه، د لغمان امنیه قوماندان د دغه سفر په ترڅ کې د «دودره» او «نراسپ» کلیو له اوسېدونکو وغوښتل چې تېرې شخړې هېرې کړي او د سولې او دوستۍ په فضا کې ژوند وکړي.

هغه زیاته کړه، د راغستان د نراسپ او دودرې کلیو اوسېدونکو د اسلامي امارت د یاد چارواکي په منځګړیتوب سوله وکړه او ژمنه یې وکړه چې وروسته له دې به شخړه نه کوي.

هغه زیاتوي، د یادې ۳۲ کلنې دښمنۍ په جریان کې چې د یادې ولسوالۍ د دوو کلیو تر منځ د څرځای پر سر رامنځته شوې وه، څلور کسان وژل شوي او ۱۱ نور ټپیان شوي وو.

د راغستان ولسوالۍ یو اوسېدونکی روح‌الله روحاني وايي چې تېرو ۳۲ کلونو کې پرله پسې نښتو او شخړو ترې د کار او پرمختګ فرصت اخیستی و او اوس پوه شوي چې دښمني یوازې ویجاړۍ رامنځته کوي.

د یادې ولسوالۍ بل اوسېدونکی احمدشهیر وايي، د یادو دوو کلیو د اوسېدونکو تر منځ سوله د دوی لپاره یو لوی فرصت دی او وروسته له دې به هڅه وکړي چې د دښمنۍ پر ځای په سوله کې ژوند وکړي.

د راغستان یاد دوه اوسېدونکي له نورو دښمنو کورنیو او کلیو غواړي چې له دښمنۍ تېر شي او د هېواد او خپلو سیمو د پرمختګ په موخه یو بل منلو او سولې ته لومړیتوب ورکړي.