کابل ښار کې د ۲۲۰ میلیونه افغانیو په لګښټ یو سوداګریز مارکېټ جوړ شو

کابل (پژواک، ۳۱ زمری ۱۴۰۳): د کابل ښاروالي وایي، د لومړۍ ناحیې اړوند منډوي سیمه کې د ۲۲۰ میلیون افغانیو په لګښت د یوه سوداګریز مارکېټ د جوړولو چارې بشپړې شوې.

د کابل ښاروالۍ استازي نعمت‌الله بارکزي نن په دې اړه جوړه شوې غونډه کې وویل چې دغه مارکېټ د خصوصي سکټور له لوري جوړ شوی دی.

هغه زیاته کړه چې دغه مارکېټ د کابل ښار لومړۍ ناحیې اړوند، منډوي سیمه کې په ۴۲۰۰ متر مربع ځمکه کې جوړ شوی او ۲۲۰ میلیونه افغانۍ لګښت پرې راغلی دی.

 د بارکزي د معلوماتو له مخې، د کابل ښاروالۍ یاد مارکېټ خصوصي سکټور ته درېیو کلونو لپاره په قرارداد ورکړی او له دغې مودې وروسته به خصوصي سکټور دغه مارکېټ بېرته کابل ښاروالۍ ته سپاري.

هغه زیاتوي، دغه سوداګریز مارکېټ په درېیو پوړونو کې په اساسي توګه جوړ شوی،۴۸۰ بابه دوکانونه لري او د جوړولو چارې یې د ۱۴ میاشتو په موده کې بشپړې شوې دي.

د بارکزي د معلوماتو له مخې، قراردادي خصوصي سکټور به حکومت ته د میاشتې ۱۷۰۰ زره افغانۍ کرایه هم ورکوي.

دا په داسې حال ده، د خصوصي سکټور له لوري د روان ۱۴۰۳ لمریز کال د تېرې غویي میاشتې په ۱۹ مه هم د کابل ښار دویمې ناحیې اړوند ده افغانانو سیمه کې د ۶۰ میلیون افغانیو په لګښت د یوه سوداګریز مارکېټ جوړولو چارې بشپړې شوې وې.