<p style="text-align: justify;">غزني (پژواک، ۸ وږی ۱۴۰۳): د غزني د قومونو او قبایلو چارو ریاست مسوولین وایي چې د دغه ولایت د ناور ولسوالۍ په برکي سیمه کې د کوچیانو د لعلزو او عبدالوالو قومونو ترمنځ د څرځایونو پر سر رامنځته شوې شخړه هواره شوه.</p>
<p style="text-align: justify;">د غزني د سرحدونو، قومونو او قبايلو چارو ریيس مولوي جانمحمد مومن پژواک خبري اژانس ته وویل، د ناور ولسوالۍ په برکي سيمه کې د وښو او څرځایونو پر سر د کوچیانو د لعلزو او عبدالوالو قومونو ترمنځ یو کال مخکي شخړه شوې وه چې پرون د ځايي قومي مشرانو، دیني عالمانو او د شخړو د حل کمېسیون غړو په منځګړیتوب پای ته ورسېده.</p>
<p style="text-align: justify;">هغه وویل، په دې شخړه کې کومه مرګژوبله نه وه رامنځته شوې.</p>
<p style="text-align: justify;">د نوموړي په خبره، بدینخېل کوچیانو هم د یادو څرځایونو د مالکیت ادعا لرله، خو وروسته د معتبرو اسنادو پر اساس معلومه شوه چې په ۱۳۴۰ لمریز کال کې د محمدظاهر شاه د واکمنۍ پر مهال دغه څرځایونه لعلزي قوم ته ورکړي شوي دي.</p>
<p style="text-align: justify;">د یادې جرګې یوه ګډونوال او قومي مشر نصرالله وویل، له دې وروسته به دواړه خواوې د سولې او ورورګلوۍ په فضاء کې ژوند کوي او پر یو او بل د تېري حق نه لري.</p>
<p style="text-align: justify;">نوموړي له مسوولینو او قومي مشرانو مننه وکړه چې د دې شخړې د حل لپاره يې هلې ځلې کړې دي.</p>
<p style="text-align: justify;">د یادونې ده، وړمه ورځ هم په دې ولسوالۍ کې د هزاره او کوچیانو ترمنځ یوه ۱۶ کلنه دښمني چې یو کس هم په کي وژل شوی او درې نور تښتول شوي وو، د قومي مشرانو په منځګړیتوب پای ته ورسېده.</p>
