<p style="text-align: justify;">کابل (پژواک، ۱۸ وږی ۱۴۰۳): چارواکي وایي چې د کابل په ترهخېلو کې د څه باندې ۱۸ میلیون ډالرو په لګښت د ۲۵۲ مېګا ولټ برېښنا په ظرفیت د یوه سبسټېشن جوړولو او له چمتلې تر ترهخېلو د ۲۲۰ کیلو ولټ مزي غځولو چارې پیل شوې.</p>
<p style="text-align: justify;">د اوبو او برېښنا وزارت سرپرست مولوي عبدالطیف منصور نن په کابل کې په دې اړه جوړه شوې ناسته کې وویل، د یادو دوو پروژو په بشپړېدو سره به - چې چارې نن پیل شوې - د کابل ښار د شاوخوا ۲۵۰ زره خلکو او صنعتي پارکونو د برېښنا د کمښت ستونزه هواره شي.</p>
<p style="text-align: justify;">هغه زیاته کړه چې په ترهخېلو کې د ۲۵۲ ميګاواټه په ظرفیت د برېښنا سبسټېشن پر جوړولو او دغه راز له چمتلې تر ترهخېلو د ۲۲۰ کیلو ولټ مزي پر غځولو ټول ۱۸.۷ میلیون امریکایي ډالره لګښت راځي.</p>
<p style="text-align: justify;">د نوموړي په خبره، دا له ترکمنستانه افغانستان ته د زر میګاواټه برېښنا رالېږدولو هغې پروژې یوه برخه ده چې پر اساس یې ۵۰۰ کیلوولټ مزي ارغندۍ ته راځي، له ارغندۍ چمتلې او هغه ځایه ترهخېلو ته غځېږي.</p>
<p style="text-align: justify;">منصور دغه راز وايي چې د ځینو کسانو هغه څرګندونې ناسمې دي چې وایي امریکا اسلامي امارت ته ډالري کڅوړې ورکوي.</p>
<p style="text-align: justify;">هغه زیاته کړه، کومې ډالري کڅوړې چې افغانستان ته راځي، هغه د نړۍوالو ادارو دي؛ پخوا به یې په مستقیم ډول ترلاسه کولې او اوس بانک ته انتقالېږي او د قانوني پړاوونو له وهلو وروسته اړوندو ادارو ته سپارل کېږي.</p>
<p style="text-align: justify;">د هغه په وینا، امریکا له اسلامي امارت سره هيڅ ډول مرسته نه کوي؛ ځکه د اسلامي امارت له خوا ماته شوې ده.</p>
<p style="text-align: justify;">د اوبو او انرژۍ وزارت سلاکار ډاکټر فاروق اعظم هم په دې ناسته کې وویل، د دې ډول لویو پروژو پرانيسته د هېواد د ابادۍ لپاره د خوښۍ زېری ورکوي.</p>
<p style="text-align: justify;">هغه زیاته کړه، اسلامي امارت ځکه د برېښنا پروژو ته لومړیتوب ورکړی چې برېښنا د نورو ډېرو پرمختګونو لپاره اسانتیا رامنځته کوي.</p>
<p style="text-align: justify;">د برېښنا شرکت عمومي رییس ډاکټر عبدالباري عمر هم په یاده ناسته کې وویل، برېښنا د ښې حکومتولۍ، اقتصاد، پرمختګ او د هېواد د ابادۍ لپاره تر ټولو مهمه اړتیا ده.</p>
<p style="text-align: justify;">هغه زیاته کړه، اسلامي امارت هغه وخت خپله سیاسي ازادي ساتلی شي چې اقتصادي ازادي ولري او خودکفا وي.</p>
<p style="text-align: justify;">د نوموړي په خبره، اقتصادي پرمختګ او خودکفایي د صنعت له لارې رامنځته کېږي او د صنعت د پیاوړتیا لپاره برېښنا ته اړتیا ده، د حکومت لومړیتوب هم همدا دی چې ټولو برخو ته برېښنا ورسوي.</p>
<p style="text-align: justify;">ده له ترکمنستانه د زر میګاواټه برېښنا رالېږد، د کابل ارغندۍ ته د ۵۰۰ کیلوولټ مزي تېرېدو او له هغه ځایه تر چمتلې او ترهخېلو غځولو ته په اشاره وویل چې د یادو پروژو په بشپړېدو به د کابل ټولو ښاریانو او صنعتکارانو ته ۲۴ ساعته برېښنا ورکول کېږي.</p>
