<p style="text-align: justify;">کابل (پژواک، ۲۲ وږی ۱۴۰۳): د میدانوردګو ولایت د مرکز اړوند اولخېلو سیمه کې پر ۲۳ جریبه ځمکه د لویو موټرو تمځای (تیرپارک) د بنسټ ډبره کېښودل شوه.</p>
<p style="text-align: justify;">د میدانوردګو ولایت مقام له لوري نن په خپره شوې خبرپاڼه کې راغلي چې د تمځای جوړولو دغه پروژه پر ۲۳ جریبه ځمکه د پنځه میلیون افغانيو په لګښت پلې کېږي.</p>
<p style="text-align: justify;">سرچینې ویلي، د یاد تمځای (تیرپارک) او احاطې ۸۶۸ متره دیوال جوړېدو چارې به د شپږو میاشتو په موده کې بشپړې شي.</p>
<p style="text-align: justify;">سرچینه زیاتوي، د دې پروژې د پرانيستې مراسمو کې د میدانوردګو مرستیال والي مولوي سيدالرحمن حافظ وویل، د ياد تمځای جوړېدو موخه دا ده چې باروړونکي موټر په همدغه ځای کې ودرېږي او تخليه شي، څو په مرکز کابل کې د ډېرې ګڼېګوڼې مخه ونيول شي.</p>
<p style="text-align: justify;">د ترانسپورټ او هوانوردۍ وزارت استازي انجنیر محمدعاصم او د میدانوردګو ولایت د ترانسپورټ مسوول مولوي نیازمحمد مغفور هم ورته څرګندونې کړې او ویلي یې دي چې د دغه تمځای په جوړېدو به په مرکز کابل کې د ترافيکو ازدحام راکم شي.</p>
