<p style="text-align: justify;">کابل (پژواک، ۲۲ وږی ۱۴۰۲): د افغانستان پخوانی ولسمشر حامد کرزی وایي، ټاپي یا له ترکمنستانه افغانستان، پاکستان او هند ته د ګاز نللیکې د غځولو پروژه، د افغانستان لپاره یوه مهمه ملي اقتصادي پروژه ده.</p>
<p style="text-align: justify;">په افغانستان کې د ټاپي پروژې چارې – چې ترڅنګ یې د نوري فایبر، اوسپنې پټلۍ او سړک پروژې هم لري – تېره ورځ د ځانګړو مراسمو په ترڅ کې پیل شوې. تېره ورځ هرات کې د «ټاپ» پروژې اړوند د نورالجهاد سبسټیشن هم ګټې اخیستنې ته وسپارل شو.</p>
<p style="text-align: justify;">د افغانستان پخواني ولسمشر حامد کرزي نن پر خپله ایکسپاڼه لیکلي: «ټاپي پروژه د افغانستان لپاره یوه مهمه ملي اقتصادي پروژه ده. په هېواد کې دننه د دې پروژې د چارو د پیلېدو استقبال کوم. د داسې مهمو پروژو د پرمخ بېولو او د وطن د ترقي او تعالي لپاره روزلي او مسلکي کدرونه په هره معنی ضروري دي. پر دې اساس پر سرپرست اسلامي حکومت غږ کوم چې د نجونو پرمخ ښوونځي او پوهنتونونه پرانیزي او په هېواد کې د تعلیم او روزنې د ودې زمینه برابره کړي.»</p>
<p style="text-align: justify;">د اقتصادي چارو ځیني شنونکي وایي، د ټاپي او نورو سیمهییزو پروژو تطبیق به د اړوندو هېوادونو لپاره د اقتصادي ګټو ترڅنګ، د سیمې پر ثبات او امنیت مثبت اغېز ولري او د بېکارۍ کچه به ټیټه کړي.</p>
