<p style="text-align: justify;">غزني ښار (پژواک، ۲ تله ۱۴۰۳): د غزني په مرکز کې د دوو قومونو ترمنځ یو کلنه دښمني د حکومتي مسوولینو، دیني عالمانو او قومي مشرانو په منځګړیتوب پای ته ورسېده.</p>
<p style="text-align: justify;">د اړوندې موضوع په اړه جوړې شوې غونډې ته د غزني د قومونو، سرحدونو او قبایلو چارو رييس مولوي جانمحمد مومن وویل چې شاوخوا یو کال مخکې د غزني د مرکز اړوند دیخداداد سیمه کې د کوچیانو او تاجک قومونو ترمنځ د ځمکې پر سر شخړه او دښمني رامنځته شوې وه.</p>
<p style="text-align: justify;">هغه وویل چې هغه مهال د تاجکو د قوم یو کس د تمانچې په ډزو وژل شوی و او په دې موده کې دواړو قومونو یو بل ته ګڼ مالي زیانونه هم اړولي دي.</p>
<p style="text-align: justify;">نوموړی وایي چې د حکومتي مسوولینو، دیني عالمانو او قومي مشرانو په منځګړیتوب او هلو ځلو دواړه لوري حاضر شول او پرون یې سوله وکړه.</p>
<p style="text-align: justify;">مومن پر یادو قومونو ټینګار وکړ چې نور په سوله کې ژوند وکړي او خپل ځوانان دښمنۍ ته پرې نه ږدي.</p>
<p style="text-align: justify;">بل لورته، د دواړو قومونو استازو یو بل ته غېږې ورکړې او ژمنه یې وکړه چې نور به په سوله کې ژوند کوي.</p>
<p style="text-align: justify;">د تاجکو قوم په استازیتوب اللهمحمد وویل چې دغه دښمني په ډېره کوچنۍ خبره پيل شوې وه او بدې پایلې یې لرلې.</p>
<p style="text-align: justify;">ده له حکومتي مسوولینو، دیني عالمانو او قومي مشرانو مننه وکړه چې د دوی ترمنځ یې روغه وکړه او د دښمنۍ مخه یې ونیوله.</p>
<p style="text-align: justify;">دغه راز، د جرګې یوه غړي او قومي مشر اغامحمد وویل، دوی هڅه کوي څو دا ډول ټولې دښمنۍ د خبرو اترو او جرګو له لارې حل کړي.</p>
<p style="text-align: justify;">نوموړی وايي چې د حکومتي مسوولینو، دیني عالمانو او قومي مشرانو په ملتیا په تېرو دوو کلونو کې دوی لسګونه داسې شخړې او دښمنۍ حل کړې دي.</p>
<p style="text-align: justify;">دا په داسې حال کې ده چې وړمه ورځ هم د غزني په ناور ولسوالۍ کې د ځايي کوچیانو او هزارهګانو ترمنځ اته کلنه دښمني پای ته ورسېده.</p>
